2019 оны эхний хагас жилд 984 үйлдэлтэй авлигын гэмт хэргийн улмаас улсад нийт 11.9 их наяд төгрөгийн хохирол учирсан байна. Энэ тоог 20 мянган төгрөгийн дэвсгэртээр зүйрлэвэл, 40 тоннын 11 ширхэг контейнер дүүргэх эсвэл дэвсгэртийг цувуулж тавьбал 89 мянга 260 км зам үргэлжлэх их хэмжээний мөнгө юм байна. Энэ мөнгөөр 4181 км хатуу хучилттай зам барьж болох байсан (Монгол Улс нийт 3015.6 км хатуу хучилттай замтай. Мөн 700 мянган айлын орон сууц барьж болох байсан (Нийслэлийн гэр хороололд 201 474 айл амьдарч байгаа). Түүнчлэн өндөр настны тэтгэвэр авдаг хүн бүрт 38 600 000 төгрөг өгч болох байсан талаар Авлигатай тэмцэх газрын Урьдчилан сэргийлэх, соён гэгээрүүлэх хэлтсээс Авлигын эсрэг олон улсын өдрийг угтсан өдөрлөгийн үеэр онцоллоо. Тодруулбал, “Танай хороонд” иргэн төвтэй соён гэгээрүүлэх өдөрлөгийг Сонгинохайрхан дүүргийн 6 болон Баянзүрх дүүргийн 9 дүгээр хорооны иргэдийг хамруулан зохион байгууллаа.
Авлигатай тэмцэх үндэсний хөтөлбөрт авлигаас урьдчилан сэргийлэх ажилд иргэд, олон нийтийн хяналт, оролцоог нэмэгдүүлэх зорилтыг дэвшүүлсэн. Энэ хүрээнд иргэд, олон нийтэд авлигын нийгмийн хор аюулыг ухуулан таниулах, тэдэнд авлигыг үл тэвчих ёс суртахуун төлөвшүүлэх, авлигатай тэмцэх үйл ажиллагаанд иргэдийг татан оролцуулах, зөвлөгөө мэдээлэл өгөх зорилгоор уг соён гэгээрүүлэх өдөрлөгийг зохион байгуулсан нь энэ юм. Авлигатай тэмцэх газраас зохион байгуулсан соён гэгээрүүлэх өдөрлөгт Улсын гавьяат жүжигчин Ш.Дэлгэржаргал оролцож, шударга ёсны төлөө санаа зориг нэгтэй байж дуу хоолойгоо нэгтгэн тэмцэхийг иргэдэд уриаллаа.
Түүнчлэн Авлигатай тэмцэх газрын ажилтнууд авлигын хор хөнөөлийг эдийн засгийн агуулгаар ойлгуулах, авлигатай тэмцэхэд иргэд ямар үүрэгтэйг ярьж таниулан, авлигын гэмт хэргийн талаар мэдээлэл хийж, ашиг сонирхлын зөрчил болон иргэд төрийн албан тушаалтны хөрөнгө, орлогын мэдүүлэгтэй хэрхэн танилцаж, хяналт тавих боломжтой талаар зөвлөгөө, мэдээлэл өгөв.
Мөн АТГ-ын хэлтсийн дарга Д.Дуламсүрэн "Авлигаас урьдчилан сэргийлэх нь зөвхөн АТГ-ын үүрэг гэж ойлгох иргэд цөөнгүй байдаг. Дэлхийн жишгээс харахад авлигатай тэмцэхдээ иргэд болон иргэний нийгмийн байгууллагуудыг түлхүү оролцуулж, авлигаас салсан түүх олон бий. Харин манайд эсрэгээрээ буюу иргэд авлигын талаарх мэдлэг, мэдээлэл дутмаг байдаг" гэлээ.
Г.Алимаа
Сэтгэгдэл (2)