Сэлэнгэ аймгийн Ерөө сумын суурьшлын бүс рүү баавгай орж ирэх болсон талаарх мэдээлэл өнгөрсөн есдүгээр сараас эхлэн тарах болсон. Уг мэдээллээр баавгайн хоол тэжээл хомсдсон учраас айлаас хоол "хулгайлж" идэх, хоттой мал руу гэтэх зэрэг халдаж эхэлсэн байна. Нутгийн иргэдийн хэлснээр цөөнгүй айлын амбаар, хашааг ухаж, сүйтгэсэн байна. Тиймээс баавгайг айлгаж, цочоохгүйгээр ой руу хөөж, үргээх зэрэг арга хэмжээ авсаар ирсэн.
Харин зарим мэдээллийн хэрэгслээр Сибирт гарсан ой хээрийн түймрээс болж Сибирийн хар баавгай ойгоор дамжиж ийн ирсэн гэх боловч үүнийг нутгийн иргэд үгүйсгэсэн юм.
Уг мэдээллийн дараахан буюу энэ сарын 4-ний өдөр Сэлэнгэ аймгийн Ерөө суманд аав, хүү хоёр баавгайд бариулж амиа алдсан хэрэг гарсан билээ. Уг хэргийг тус аймгийн цагдаагийн байгууллага мөрдөн шалгаж байгаа бол аймгийн Онцгой комиссийн хуралдаанаас амиа хамгаалах зорилгоор баавгайг буудаж болохыг зөвшөөрсөн. Өмнө нь тусгай зөвшөөрөлгүй бол баавгай агнах, буудах нь хуулиар хориотой байсан юм. Үүнээс гадна иргэдийг харуй бүрий болоход гэрээсээ гарахыг хориглож, хаалга үүдийг нь самардах тогших дуулдвал хариу өгөхгүй бол онгойлгохгүй байхыг зөвлөжээ. Тэгвэл тус сумын нутагт дахин нэг "хэрэг" гарсан байна.
Тодруулбал, ойн баавгай нутгийн иргэн Б-гийн гэрийн гадаах амбаар руу баавгай дайрч зарим цахилгаан хэрэгслийг нь эвдэж, тахиан байрыг нь сүйтгэсэн байна. Улмаар амбаарт байсан 120 литрийн савтай айргийг 100 орчим метр газарт аваачиж, хагалан уусан байна. Энэ мэтчилэн баавгайд холбогдох хэрэг гарсаар байгаа учир нутгийн иргэд ээлж гарган жижүүрлэж байхаар болсон тухай мэдээлжээ.
Сэтгэгдэл (16)