Хошууч генерал Б.Баярмагнай тэргүүтэй цэрэг арми, төр, нийгэмд ажиллаж байсан нэр бүхий хүмүүс нэгдэж “Монголын Үндэсний фронт” байгуулсан тухайгаа зарлалаа. АИХ-ын дарга асан Ж.Гомбожав, Ерөнхийлөгчийн орон тооны бус зөвлөх Ч.Хурц, иргэний хөдөлгөөний Ц.Мөнхбаяр, тоймч Ш.Гантулга, Т.Баярхүү уг фронтод нэгдсэн гэх. Хамгийн ноцтой нь уг фронтоос өнөөгийн төрийн дэглэмийг нурааж, шаардлагатай бол төрийн эрхийг хүчээр авна гэв. Цаашлаад тус фронтын гишүүд, дэмжигчдийн III хурал гэгчийг Соёлын төв өргөөнд хийх үеэр тэргүүн генерал Б.Баярмагнай “Ерөнхийлөгч Х.Баттулгатай биечлэн уулзсан. Есдүгээр сарын 13-нд уулзах хүсэлтээ тавьсан. 40 хоног хүлээсэн. Тэсвэр алдсан. 30 хоног хүлээдэг энэ заалтынх нь дагуу хүлээсэн. 40 дэх хоногтоо орж уулзсан. Ерөнхийлөгч хоёр зүйлийг бүрэн хүлээн зөвшөөрсөн. Нэгдүгээрт, “Монголын Үндэсний Фронт” -ыг бүрэн хүлээн зөвшөөрсөн. Хоёрдугаарт, Монгол төр мухардалд орсныг хүлээн зөвшөөрсөн. Хоёр зүйлийг бид баталгаажуулсан. Бидэнд гарц байгаа гэдгийг. Гарцгүй бол тэмцэл байхгүй. Энэ УИХ-ыг тараана. Монгол төрийг шинээр эмхлэн байгуулна. Та бүхний санаж бодож байгаатай ижилхэн байна. Энэ бүхнийг ард түмний оролцоотойгоор Ардын Түр Хурлыг байгуулна” гэжээ.

Төрийн тэргүүний хувьд Зэсвэгт хүчний ерөнхий командлагчийн хувиар энэ салбарт олон жил ажилласан, зовлон жаргалыг нь сайн мэдэх генерал Б.Баярмагнай гэсэн хувь хүнтэй ийн санал солилцсон байж болох.

Харин генерал Б.Баярмагнай тэргүүтэй хөдөлгөөний санаачилгыг Ерөнхийлөгчийн хувиар дэмжихээ илэрхийлсэн бол ноцтой асуудал. Зэвсэгт хүчний тухай хуулийн 4.8 дахь заалтад ч энэ тухай тодорхой бичсэн нь бий.

Тодруулбал, “Монгол Улсын нутаг дэвсгэрт цэргийн байгууллага хууль бусаар байгуулахыг хориглоно” хэмээн заасан байдаг. Үүнийг зэвсэгт хүчинд олон жил ажиллаж асан генерал Б.Баярмагнай сайн мэдэх хүний нэг.

Гэтэл төрийн эргэлт хийх тухайгаа уламжилсныг нь Зэсвэгт хүчний ерөнхий командлагч дэмжсэнийг нь юу гэж ойлгох вэ. Монгол Улсын зэвсэгт хүчин нь улсыг цэргийн хүч, хэрэгслээр батлан хамгаалах зорилго бүхий төрийн цэргийн байгууллага мөн гэдгийг хуульчлаад удаж байна.

Уг хуульд зааснаар

9.1.Зэвсэгт хүчний улс төрийн дээд удирдлагыг Монгол Улсын Их Хурал хэрэгжүүлнэ.

9.2.Зэвсэгт хүчний төрийн захиргааны удирдлагыг Монгол Улсын зэвсэгт хүчний ерөнхий командлагч, Монгол Улсын Засгийн газар, батлан хамгаалах асуудал эрхэлсэн Засгийн газрын гишүүн хууль тогтоомжоор олгогдсон бүрэн эрхийнхээ хүрээнд хэрэгжүүлнэ.

9.3.Зэвсэгт хүчний цэргийн мэргэжлийн дээд удирдлагыг Зэвсэгт хүчний Жанжин штабын дарга хэрэгжүүлнэ.

9.4.Зэвсэгт хүчний цэргийн захиргааны удирдлагыг төрлийн цэргийн командлагч, нэгтгэл, анги, байгууллага, салбарын захирагч хэрэгжүүлнэ.

9.5.Цэргийн мэргэжлийн удирдлагыг төрөл мэргэжлийн цэргийн дарга хэрэгжүүлнэ.

9.2.Зэвсэгт хүчний төрийн захиргааны удирдлагыг Монгол Улсын зэвсэгт хүчний ерөнхий командлагч, Монгол Улсын Засгийн газар, батлан хамгаалах асуудал эрхэлсэн Засгийн газрын гишүүн хууль тогтоомжоор олгогдсон бүрэн эрхийнхээ хүрээнд хэрэгжүүлнэ хэмээсэн байдаг.

Энгийнээр тайлбарлавал хэн нэгэн генерал хөдөлгөөн, фронт байгуулаад бусдыг нэгтгэх замаар төрийн эргэлт хийх эсэх нь хуулиар хаалттай гэсэн үг. Эсргээрээ хууль зөрчинө. Төрийн эрхийг хууль бусаар авах гэсэн ялд унана. Гэтэл нэр бүхий хүмүүсийг нэгтгэж, төр эргүүлэх тухай ил тод яриад байгаа нь хачирхалтай. Эрх биш хуультай, дүрэмтэй улсад эмх замбараагүй байдал, зөрчил үүсгэхээс урьдчилан сэргийлэх үүрэгтэй холбогдох хуулийн байгууллага нь ажлаа хийж байгаа гэдэгт найдъя.Тийм биш бол ганцхан асуулт тавъя. Төрийн эргэлт хийх тухайгаа дуулгасныг албан бусаар дэмжсэн гэх генерал Б.Баярмагнайгийн хэлсэн үнэн үү, Ерөнхийлөгч өө?

Г.Эрхэс