Улсын баатар, хотын дарга асан Э.Бат-Үүл шинэ оны босгон дээр нэгэн ярилцлага өгчээ. News.mn сайтад. “Өнгөрсөн хавар бичсэн миний нийтлэлийн дагуу Ерөнхийлөгчийн Тамгын газрын зүгээс надад захиргааны хариуцлага ногдуулах хоёр ч хүсэлт цагдаад хандан гаргаж, намайг нийтдээ дөрвөн сая төгрөгөөр торгосон” хэмээн эхэлсэн түүний ярилцлагад хэд хэдэн анхаарал татах агуулга бүхий өгүүлбэрээр түүний байр суурь, гол санаа илэрхийлэгджээ.

Сонирхолтой нь, Ерөнхийлөгч Х.Баттулгатай толхилцох болсон Үүл баатар парламентаас батлаад удаагүй байгаа Сонгуулийн хуулийн хүрээнд МАХН-ын дарга Н.Энхбаярыг өмөөрсөн утга бүхий тайлбарыг хийсэн байх юм.

“Цагдаа болон прокурор, шүүх улаан цайм Ерөнхийлөгчид үйлчилж байна билээ. Би дээд шатны шүүхэд давж заалдсаар байгаа. Би аль 1990-ээд оноос айх, шантрах гэдгийг мартсан. 1988 онд ухуулах хуудас наагаад баривчлагдаж очиход цаазаар авах ялтай хэрэг үйлдсэн хэмээн НАХЯ-ны тасгийн дарга сүрдүүлж байсан юм. Залуудаа айгаагүй байж өдий насандаа айх, шантрах гэж юу байх вэ, шийдсэн хүн шүү дээ” хэмээсэн тэрбээр үргэлжлүүлэн “Лам хүнийг еврейчүүд шиг амьд явах эрхийг нь цуцалсан тул хүссэн ногоон малгайтан хүссэн аргаараа алж байлаа.

Хуулиар яллах гэдэг ийм аюултай. Энэ аргыг өнөөдөр Н.Энхбаярт зориулан сэргээж байна.

Бусдын эрх, эрх чөлөөнд ямар ч гэм учруулаагүй Н.Энхбаярыг шүүхээр яллаж чадахгүй болохоор нь хууль гарган сонгуульд нэр дэвших эрхийг нь цуцаллаа. Тэд чаддагсан бол амьд явах эрхийг нь цуцалж мэдэх юм байна. Ардчилсан хувьсгалыг коммунистууд, эрүүгийн гэмт хэрэгтэн хоёр нийлж байгаад хийчихсэн юм шиг суртлаар дүүрэн “37-р точка” гэдэг киног Х.Баттулга захиалсан гэсэн цуу гадуур бий. Би гүжирдсэн бол баяртайгаар торгуулиа төлнө” гэжээ.

Эндээс нэг асуулт гарнэ. Нэгэнтээ буюу Ерөнхийлөгч Х.Баттулгыг Төрийн тэргүүнээс сонгогдсоноос хойш хэрэгжүүлж байгаа бодлого шийдвэрийг, нэр дэвшүүлсэн намаас нь буюу Ардчилсан намаас хамгийн их шүүмжилж ирсэн хүний нэг нь Э.Бат-Үүл баатар.

Монгол Улсын засаглалын тогтолцоог нэг хүний дарангуйллын хэлбэрт шилжүүлэх оролдлогоос нь эхлээд ОХУ-аас хэт хамааралтай буйг эсэргүүцсэн улс төрийн “фронт”-ыг тэр ганцаараа шахуу тэргүүлж зогссон уу, зогссон.

Хийж байгаа үйлдлээрээ гэхээсээ өөрийн бичсэн нийтлэлийнхээ хүрээнд хэрэндээ тэмцсэн, шүүмжилсэн. Одоо ч шүүмжилж байна. Үүнтэй хэн ч маргахгүй. Угаас олон нийтэд ил болсон асуудал, улс төрд, АН-ын лидерүүдээс гарах болсон эрүүл шүүмжлэлийн нэг.

Гагцхүү өчигдрийн хотын дарга Э.Бат-Үүл, өнөөдрийн Улсын баатрын хувиар МАХН-ын дарга Н.Энхбаярыг яагаад өмөөрөх болов гэдэг нь асуулт дагуулах шалтгаан болж байна. Нэг үгээр “Лам хүнийг еврейчүүд шиг амьд явах эрхийг нь цуцалсан тул хүссэн ногоон малгайтан хүссэн аргаараа алж байлаа. Хуулиар яллах гэдэг ийм аюултай. Энэ аргыг өнөөдөр Н.Энхбаярт зориулан сэргээж байна” гэсэн өгүүлбэрийн тухайд.

Санаж байгаа бол Н.Алтанхуяг Ерөнхий сайдаар ажиллаж байхдаа МАХН-ын дарга Н.Энхбаяртай урт хугацаанд хамтран ажиллах үеэр хамгийн их эсэргүүцсэн хүний нэг нь тухайн үеийн хотын дарга, АН-ын хорооны дарга Э.Бат-Үүл байв.

“Авлигын загалмайлсан эцгийн хувийн намыг хэзээ ч дэмжиж ажиллахгүй” хэмээх түүний үг одоо ч хэвлэлийн хуудаснаа шарлаагүй байна. Улмаар өөрийнх нь тодорхойлсноор буюу "Авлигын загалмайлсан эцгийн хувийн нам" болох МАХН-тай гэрээ байгуулсан намын дарга Н.Алтанхуягийнхаа тэргүүлсэн Засгийн газрыг унагаахад түүний нийгэмд үзүүлсэн нөлөө их байв. Юу үнэн, энэ л үнэн. 

Чухам яагаад өнөөдөр Үүл баатрын амнаас өөрийн намын тэргүүлсэн Засгийн газраа огцруулах хүртэл үндэслэл болсон Н.Энхбаярыг өмөөрөх байр суурь гарав гэдэг нь сонирхолтой.

Магадгүй ардчиллын амин сүнс болсон хүний эрх, эрх чөлөө, сонгох, сонгогдох эрхийг тууштай хамгаалж ирсэн Э.Бат-Үүл даргын эго энэ удаад Н.Энхбаярыг өмөөрөх сэдэл байсан байж мэдэх.

Гэхдээ авлига, албан тушаалын хэрэгт холбогдсон, шүүхээр таслуулсан улстөрчдийн нэр дэвших эрхийг хязгаарласан хуулийг баталсны дараа ардчилсан хувьсгалын гол авторын нэг болсон Э.Бат-Үүл ийн дуугарах болсон нь хачирхалтай биш гэж үү. Бүр "Авлигын загалмайлсан эцэг"-ээр өргөмжилж явсан хүнийхээ тухай. Н.Энхбаярыг "өмөөрөх" жудаг Үүл баатарт үлдсэн л юм байна!

Г.Эрхэс