Франц улсад суух Онц бөгөөд Бүрэн эрхэт Элчин сайд А.Баттөрд оффшор бүсэд мөнгө угаасан байж болзошгүй мэдээлэл цацагдсан. Энэ талаар Гадаад харилцааны сайд Д.Цогтбаатар “Хар тамхины хэргийн улмаас Европит байгаа бүх Элчин сайдын яамдууддаа хяналт, шалгалт хийж байгаа. Хууль хүчний байгууллагаас ганц асуудлаар биш байж болзошгүй бүх асуудлаар шалгалт хийж байгаа. Үүний үр дүнд илэрсэн хэрэг гэж ойлгож байна. Хэргийг мөрдөн шалгах ажиллагаа үргэлжилж байгаа учраас хөндлөнгөөс нөлөөлөхгүй байх үүднээс ямар нэгэн тайлбар асуугаагүй. Харин хил давах эрхийг нь хязгаарласан мэдээлэл ирсэн. Усан үзмийн талбайтай хаус гэсэн мэдээлэл цацагдсан. Энэ талаарх мэдээллийг мэдэхгүй байна. Төр хяналттай байна, хууль ёсоор ажиллаж байгаа алба хаагчдыг дэмжинэ. Харин хууль бус үйлдэл гаргавал төр хариуцлага тооцно гэдгийг иргэд ойлгох хэрэгтэй. Европи дахь хуулийн байгууллагатай хамтарч ажиллаж байгаа, хяналт тавьж байгаа. Бүр тэнд ашиглаж байгаа тээврийн хэрэгслээ хүртэл хянаж байгаа. А.Баттөрийн хувьд өмнө нь Францад сууж байсан. Намайг сайдаар томилогдохоос өмнө Элчин сайдаар томилогдсон. Монгол Улсын нэр төртэй холбоотой асуудал учир хуулийн дагуу хатуу хариуцлага тооцох ёстой. Дипломат албыг чанаржуулахын тулд боловсон хүчин бэлтгэх тогтолцоонд тусгайлан анхаарч байна. Олон улсын хуульчдыг олноор бэлтгэх хэрэгцээ байна. Дэлхий даяаршиж байна. Дагаад асуудал олон гарна. Үүнд олон улсын хуульчид л ажиллана шүү дээ" гэв. 

Г.Алимаа