Ерөнхийлөгч Х.Баттулга шинэ оны босгон дээр ахмадуудын тэтгэврийн зээлийг тэглэх асуудлаар Үндэсний аюулгүй байдлын зөвлөлөөс зөвлөмж гаргасан тухай зарласан нь энэ өдрүүдийн гол байсаар ирэв. Цаашдаа ч байх нь тодорхой болж байх шиг. Өөрийнх нь даргалдаг УИХ-ын дарга, Ерөнхий сайд нар бүрэлдэхүүнд багтдаг зөвлөлөөс ийм зөвлөмж гарсан болохоор Засгийн газар хуралдаж, хуулийн төсөл боловсруулснаа спикер Г.Занданшатарт гардуулав. Өчигдөр хуралдсан МАН-ын бүлэг, АН-ын зөвлөлөөс ч Ерөнхийлөгчийн мэдэгдлийг дэмжиж буйгаа илэрхийлсэн хэвлэлийн бага хурал аль аль нь хийлээ.

Одоо Засгийн газраас өргөн барьсан хуулийн төсөл Байнгын хороо, чуулганы нэгдсэн хуралдааны босго хэрхэн давж, яаж өөрчлөгдөх, ямар санал тусахаас уг асуудлын зангилаа нэг тийш болох учиртай. Гэтэл үүнтэй зэрэгцэн МАХН-ын ерөнхий нарийн бичгийн дарга Б.Тулга тэргүүтэй тус намынхан мэдээлэл хийв.

Б.Тулгын хэлснээр “МАХН 2019 онд "Өргүй монгол" үндэсний хөтөлбөрийг улс орон даяар хэрэгжүүлж өрийн дарамттай иргэдтэй уулзаж, судалгаа гаргасан. Улмаар ипотекийн 8 хувийн зээлийн хүүг тэглэх,  зээлийн хүүг үндсэн зээлийн төлбөрт тооцох, цалингийн зээлийн хүүг тэглэх, малчдын зээлийн хүүг тэглэх, эдгээр тэглэсэн зээлийн хүүгийн төлбөрийг нэгтгэн тооцож төр засгаас арилжааны банкуудад нэг удаа нөхөн олгохыг шаардаж байсан.

2019-2020 онд шилжих үед Ерөнхийлөгч Х.Баттулга хэлсэн мэндчилгээндээ ахмад настнуудын тэтгэврийн зээлийг нэг удаа тэглэх нь зүйтэй гэсэн. Ерөнхийлөгчийн санаачилгыг талархан хүлээж авч байгаа. Аливаа асуудлыг цогцоор нь шийдэх нь чухал. Аль нэг хэсгийг тайрч аваад шийдэх нь буруу үр дүн гаргах эрсдэлтэй байдаг. Өр, зээлийн асуудал зөвхөн ахмадуудад тулгамдаад буй биш. Нийт ард иргэдэд тулгамдаж байгаа асуудал учраас ипотекийн болон цалингийн, малчны зээлийн хүүг ч нэг удаа тэглэх бүрэн бололцоотой гэсэн судалгааг бид гаргаад байна" гэв.

Хамгийн хачирхалтай нь, тэтгэврийн зээл авсан ахмадуудад үзүүлж буй дэмжлэгийн жишгээр зээл аваагүй 176 мянга орчим ахмадад тус бүр сая төгрөгийн урамшууллыг нэг удаа олгох асуудлыг хамтад нь шийдвэрлэх ёстой хэмээв.

Яг л 2008 оны сонгуулийн АН 1, МАН 1.5 сая төгрөг амлаж байсан шиг. Нэг үгээр тэтгэврийн зээлийг нэг удаа тэглэх санаачилга Ерөнхийлөгчөөс гарч, МАН-ын дэмжлэгтэйгээр парламентын босго даваад байгаа асуудлын сүүдэрт МАХН ээлжит популизмаа хийсэн нь энэ байв.

Тодорхой шийдэл, тооцоо судалгаа, эдийн засагт нөлөөлөх сөрөг үр дагаврыг нь тооцоолохгүйгээр хий хоосон амлалт өгч, нийгмийн тархийг угаах нь өөрөө популизмын энгийн нэгэн хэлбэр. Харин үүнийг хамгийн чангаар шүгэл үлээж, нийгмийн уур амьсгалыг өөрсдийн зүг чиглүүлэгчээр МАХН тодрох болсоор удаж байна. Үүний тод илрэл нь үлдсэн 176 мянга орчим ахмадад нэг сая төгрөг олгохыг шаардсан Б.Тулга даргын үг. Тэгээд ч 176 мянган ахмадад нэг удаа сая төгрөг олгох хэмжээний мөнгө манай эдийн засагт бий юу гэвэл байхгүй. Багаар бодоход 176 тэрбум төгрөг болно.

Ийм хэмжээний мөнгийг нэг удаа гаргаснаас улс, нийгэмд хэрэгтэй байгаа сургууль, цэцэрлэгийн бүтээн байгуулалтад зарцуулах нь илүү оновчтой. Бидний ирээдүйд хэрэгтэй.

Тийм атал сонгуулийн хамгийн идэвхтэй хэсэгт зориулсан бараг боломжгүй популизм хийж, шүгэл үлээх болсон МАХН-ын цаад зорилго юу вэ?. Тэгээд хавханд хэзээ ч үнэгүй бяслаг байдаггүйг энд зориуд тодотгох хэрэгтэй. МАХН-ынхан ч ахмадуудад хайртайдаа ийм санал санаачилга гаргаагүй болов уу? Магадгүй энэ мэтчилэн иргэдэд таалагдах зорилгоор нэр дэвших эрхээ гурав дахиа хязгаарлуулаад байгаа намын даргынхаа сонгуульд оролцох замыг нь засч буйг үгүйсгэх аргагүй.

С.Сүлд