Ерөнхий сайд У.Хүрэлсүх МАН-ын бүлгийн хуралдаанд оролцох үеэрээ сонгуульд нэр дэвшигчдээс нэг ч төгрөгийн хандив авахгүй гэдгээ илэрхийлсэн. Улмаар тухайн нэр дэвшигчийн ёс зүй, иргэдийн дэмжлэгийг харгалзаж, судалгаа явуулсны үндсэнд сонгуульд өрсөлдөх боломжийг олгоно хэмээгээд буй.

Эрх баригч намын даргын уг шийдвэрт сөрөг хүчин АН-ын удирдлагуудын шүүмжлэлтэй хандаж эхэлжээ. Тухайлбал, АН-ын дарга С.Эрдэнэ Ерөнхий сайдын эл байр суурийн талаар "Манай нам нэр дэвшигчдээсээ хандив авна гэдгээ мэдэгдсэн. 100 сая төгрөг босгож чадахгүй бол УИХ-д нэр дэвшээд яах юм бэ. Мөнгөгүй сонгууль хийж болох л байх. Сонгуульд оролцох урсгал зардал гэдэг зүйл бий. Машин бензинээр явна, тэр олон байшингуудад нь ус, тог, халаалт хэрэгтэй.

Намын аппаратын цалин зэрэг мөнгө зайлшгүй хэрэг болно. Улс төр гэдэг мөнгө. Тэр мөнгөө энэ олон орд болон ЖДҮ, 60 тэрбум, хөдөлмөр эрхлэлтийн сангийн мөнгө, концесс гээд авлигаар бид бүрдүүлчихсэн гээд байгаа юм уу.

Ямар ч нам хандив цуглуулдаг. Бид тэр хандиваа ил тод зарласан. Энэ бол эрүүл үзэгдэл. Энэ мэдэгдэлтэй холбоотойгоор МАН-ын сонгуульд оролцсон зардал мөнгийг төр, ялангуяа Сонгуулийн ерөнхий хороо, аудитын байгууллага маш нарийн хяналт тавих ёстой гэж харж байгаа" гэжээ.

УИХ-аас баталсан Сонгуулийн тухай хуульд нэр дэвшигч иргэнээс гурван сая, хуулийн этгээдээс 15 сая хүртэл төгрөгийн хандива авахаар заалт бий. Харин АН-ын хувьд өнгөрсөн арваннэгдүгээр сард хуралдсан ҮБХ-ноос сонгуульд нэр дэвшихээр бол 100 сая төгрөгийн хураамж төлөхөөр шийдвэрлэсэн байдаг. Энэ хүрээнд тус намын горилогчид энэ сарын 1-нээс өмнө 40 хувиа тушаасан байх ёстой гэсэн босго тогтоогоод байгаа юм.

Харин АН-ын энэ шийдвэр ид дундаа хэрэгжиж байгаа цаг үед Ерөнхий сайд У.Хүрэлсүх нэр дэвшигчдээсээ нэг ч төгрөгийн хандив авахгүй гэдгээ илэрхийлсэн нь  С.Эрдэнэ даргыг эгдүүцэхэд хүргэсэн бололтой. Гагцхүү "100 сая төгрөг босгож чадахгүй бол УИХ-д нэр дэвшээд яах юм бэ" хэмээсэн С.Эрдэнэ даргын үг ирэх сонгуулиар өмнөхөөсөө илүү бэл, бэлчинтэй нэр дэвшигчид тус намаас өрсөлдөхөөс өөр сонголтгүй үлдсэн гэдгийг хэлсэнтэй агаар нэг буув.

С.Сүлд