Ирэх сонгуультай холбоотой асуудлаар Сонгуулийн ерөнхий хорооноос мэдээлэл хийлээ.

Сонгуулийн ерөнхий хороо энэ сарын 8-нд хуралдаж, сонгуулийн хуваарийг баталжээ. Энэ талаар СЕХ-ны ажлын албаны дарга Д.Баяндүүрэн “Сонгуулийн цаг хугаацаны хуваарьт энэ үеэр хийгдэх ёстой бүх үйл ажиллагаа орсон. Үүнийг сонгуулийн үйл ажиллагаанд оролцож байгаа нам эвсэл, нэр дэвшигч болон бусад субъектүүд хугацааны хувьд мөрдөж ажиллах ёстой.  Хоёрдугаарт, СЕХ 2020 оны УИХ-ын ээлжит сонгуулийн бэлтгэл ажлын төлөвлөгөөг баталсан. Бэлтгэл ажлын хүрээнд нэг, хоёр, гуравдугаар саруудад хийх үйл ажиллагаагаа төлөвлөсөн.

Тухайлбал, хуульд олон дүрэм журам батлахаар заасан. Энэ хүрээнд 14 журам, гурван заавар, маягт загваруудыг батална. Эдгээрийг хоёр, гуравдугаар саруудад хийнэ. Дөрөвдүгээр сард аймаг, нйислэлийн сонгуулийн хороо байгуулна. Дээд тал нь есөн хүний бүрэлдэхүүнтэй байх бөгөөд төрийн захиргааны болон үйлчилгээний алба хаагчид байна. Эдгээр хүмүүс СЕХ-оос заасан сургалтад хамрагдаж, гэрчилгээ авсан байх ёстой. Нийт 340 орчим сум, дүүргийн хороо байгуулагдана.

Гуравдугаарт, мөн жижиг хороодууд тавдугаар сарын 15-аас өмнө байгуулагдах ёстой. Сонгуулийн цаг хугацааны хуваарьт бүх зүйлийг тодорхой заасан. Тухайлбал, нам эвслүүд дөрөвдүгээр сарын 25-аас өмнө сонгуульд оролцохоо илэрхийлэх юм. Өмнөх сонгуульд 12 нам, гурван эвсэл оролцож байсан. Бүртгэх эсэхийг шийдсэн шийдвэрийг дөрөвдүгээр сарын 29-өөс өмнө гаргана.

Мөн УИХ-ын сонгуульд оролцохоор бүртгүүлсэн нам эвсэл нэр дэвшүүлэх ажиллагаа явуулна. Нэр дэвшигчдийг СЕХ бүртгэх бөгөөд бүртгэсэн нэр дэвшигчдээ санал авахаас 22 хоногийн өмнө үнэмлэх гаргана. Сонгуулийн сурталчилгаа 22 хоног явагдана. Өнгөрсөн долоон сонгуулиар 2840 орчим хүн нэр дэвшсэн байна. 2016 оны сонгуульд 496 хүн нэр дэвшсэн тоон мэдээ гарсан. Нийт 2500 ширхэг санал тоолох төхөөрөмжтэй. Уг санал тоолох төхөөрөмжийг өмнөх зургаан сонгуульд хэрэглэж байсан. Үүнийг хэрэглэх УИХ-ын тогтоол гарсан учраас хэрэглэхээс өөр аргагүй” гэлээ.

Б.Лхам