Хотын дарга С.Амарсайхан "Нийслэлийн иргэдийн гомдол мэдээллээр зарим тушаал гаргасан байна. Тодруулбал, авлига нэхсэн, иргэдийн гомдол саналыг авч хэлэлцээгүй, ажлын доголдол гаргасан зарим албан тушаалтантай хариуцлага тооцсон байна. Энэ талаар хотын дарга “Ажилдаа хариуцлагагүй хандсан алба хаагчтай хариуцлага тооцно. Тиймдээ ч зарим алба хаагчтай хариуцлага тооцсон” гэдгийг мэдээллээ. Үүний дараа иргэдээс ирсэн асуултад хариулт өглөө.

-Иргэдийн амь нас, эрүүл мэндийг хамгаалах чиглэлээр холбогдох албаныханд ирэх сарын 1-нийг хүртэл хугацаатай үүрэг өгсөн. Хэрвээ энэ үүргийг биелүүлэхгүй бол ямар хариуцлага хүлээлгэх вэ?

-Энэ ажлыг хариуцаж ажиллаж байна. Хотын Ерөнхий менежерээр ахлуулсан таван байгууллага ажлын хэсэгт орсон. Бусад байгууллагууд оролцоотой ажиллах ёстой. Хэрвээ эрсдэлтэй хашаа хороог буулгаж, өнгө үзэмжийг нь сайжруулах арга хэмжээ аваагүй бол хариуцсан алба хаагчтай арга хэмжээ ярина. Иргэн, ААН-д хандаж хэлэхэд өмчилсөн, эзэмшлийн алин ч бай, хамаагүй. Эрсдэл учруулах хэмжээний, өнгө үзэмжгүй хашаа, хайсаа тордохгүй бол хот өөрийн зардлаар цэгцэлж, буулгахыг нь буулгаж, тохижуулна. Харин зарллыг нь тухайн ААН, иргэнээс гаргана шүү.

-Баянгол дүүрэг, 14 дүгээр хорооны "Алтан дуулга Хаус" компани 65 сая төгрөгийн тохижилтын ажил авсан ч хангалтгүй хийсэн. Үүнийгээ Улсын комисст хүлээлгэж өгөх гэж байна. Үүнд иргэд гомдолтой байна. Арга хэмжээ авч өгнө үү?

-Улсын комисстой холбоотой олон гомдол ирж байна. Шаардлага хангаагүй, бүрэн гүйцэт бус, тохижилт хийгээгүй барилга байгууламжийг хүлээж авсан асуудал гарч байна. Үүнийг анхаарч ажиллана. 14 дүгээр хороонд баригдсан тоглоомын талбайг Улсын комисст хүлээлгэж өгөх шаардлага хангаагүй гэж иргэд үзсэн. Тэд ингэж дүгнэх эрхтэй. Учир нь иргэдийг, олон нийтийн цагдааг хяналт тавь гэж бид хүссэн. ганц энэ асуудал биш бусад олон асуудалд иргэд хяналт тавих эрхтэй. Зөвхөн дотоод засал хийчихээд гадна тохижилтоо хийгээгүй бол улсын комисс хүлээж авах учиргүй.

-Хан-Уул дүүргийн гэр хорооллын айл өрхийн нүхэн жорлонгийн ариутгал хийгдэхгүй байна?

-Ажил эхэлсэн. Энэ долоо хоногт дуусах ёстой. Бидэнд тайлан мэдээ ирүүлэх ёстой. Үүний дараа мэдээлэл өгье. 

-Баянзүрх дүүргийн нутаг дэвсгэр дэх хорооллын хашаа нурснаас болж долоон автомашин эвдэрсэн. Үүний хариуцлагыг хэн хүлээх бэ?

-Анхааруулга сэрэмжлүүлэг өгсөөр байтал хариуцсан ажлаа хийгээгүйгээс болж эрсдэл гарч байна. Иргэдийн хувьд ч автомашинаа байрлуулахдаа эргэн тойронд эрсдэл байна уу, үгүй юү гэдгийг анзаарч харах ёстой. Мөн эрсдэл үүсгэхгүй байх гэж яриад байгаа нь энэ. тухайн ААН-үүд өөрийн эзэмшлийн талбайд гарах эрсдэлийг арилгаагүйгээс болж гарсан хохирлыг тухайн ААН, иргэн хариуцна. Хяналт тавиагүйгээс болж эрсдэл үүссэн бол тухайн албан хаагч мөн хариуцлага хүлээнэ.