Монгол Улсаас БНЭУ-д суугаа Онц бөгөөд Бүрэн эрхэт Элчин сайд Г.Ганболд өөрөөс нь тусламж хүссэн эмэгтэйг зодож танхайрсан гэх хэрэг одоогоос жил гаруйн өмнө дэгдэж, олны анхаарал татаж байв. Тухайн үед Элчин сайдад зодуулсан эмэгтэйн биеийн байдал муудаж эмнэлэгт хүргэгдсэн гэж хэвлэлүүд мэдээлсэн. 

Хэргийг нэхэн сануулбал, Элчин сайд Г.Ганболдоос тусламж хүссэн эмэгтэйн нөхөр цахим хуудсаар дамжуулж, хоёр сартай охиноо эмчлүүлээд буцах гэтэл аргагүйдсэн. Өөрөө охиноо сахиж үлдээд эхнэрээ Элчин рүү явуултал зодчихлоо гэж мэдэгдсэн юм.

Уг мэдээллийг Элчин сайд Г.Ганболд эрс няцааж “Иргэн Б.Батчулуун, Г.Оюун нар ЭСЯ-нд ирж, “Шинэ Дели хотын “BLK” эмнэлэгт цаашид охиноо эмчлүүлэхгүй, санал болгож байгаа эмчилгээг нь хийлгэхгүй, даруйхан нутаг буцахаар шийдлээ. Энэтхэгт байх визний хугацаа хэтэрсэн, торгуулийн хэмжээ их болоод байгааг хөнгөлүүлж, хилээр гарах зөвшөөрөл олгож тусална уу” гэж хүссэн.

Үүнийг ЭСЯ-ны гуравдугаар нарийн бичгийн дарга, консулын ажилтан Л.Батсуурьт даалгаснаар асуудал шийдэгдсэн. Б.Батчулуун “BLK” эмнэлэгт төлөх мөнгө байхгүй тул эмнэлгийн төлбөрөөс хөнгөлүүлж өгнө үү” гэж дахин хүссэний дагуу эмнэлэгтэй нь ярьж гурван сая энэтхэг рупи буюу 42,857 ам.долларын төлбөр, визний хугацаа хэтэрсний 300 ам.долларын торгуулийг чөлөөлүүлсэн. Миний зүгээс түүний биед нь халдсан зүйл байхгүй” гэсэн тайлбарыг хэлсэн юм.

Ингээд хэрэг замхарсан. Улсаа төлөөлөн харьд суугаа Элчин сайд хүн өөрийн улсын иргэний биед үнэхээр халдсан уу, халдсан бол зөвхөн санхүүгийн дэмжлэг үзүүлсэн төдийхнөөр хэргийг хаагаад өнгөрөх нь зөв үү, үгүй юү гэдэг асуулт эзэнгүй үлдсэн.

Тэгвэл бидэнд олдсон мэдээллээр Элчин сайд Г.Ганболдыг бусдын үед халдсан болох нь цагдаагийн байгууллагын шалгалтаар тогтоогджээ.

ЦЕГ-аас Гадаад харилцааны яаманд хүргүүлсэн 2019 оны зургадугаар сарын 7-ны өдрийн 12/1104 тоот албан бичигт “... хэрэг бүртгэлийн ажиллагааны хүрээнд цугларсан нотлох баримтуулдаар Монгол Улсаас Энэтхэг улсад суугаа Элчин сайд Г.Ганболд нь Монгол Улсын иргэн Г.Оюуны биед халдсан зөрчил тогтоогдсон. Иймд Зөрчлийн тухай хуулийн 5.3 дугаар зүйлийн 1 дэхь хэсэгт /Хүний биед халдах/ зааснаар Элчин сайд Г.Ганболдод 100 мянган төгрөгөөр торгох шийтгэл оногдуулсан 0010044 дугаартай шийтгэх хуудас хүргэв...” гэжээ.

Тиймээс энэ талаар БНЭУ-д суугаа Элчин сайд Г.Ганболдоос тодрууллаа.

-Өнгөрсөн 2018 онд таниас тусламж хүссэн эмэгтэйн биед халдсан гэдэг асуудал гарсан. Хэргийг цагдаагийн байгууллагаас шалгана гэж байсан. Танд хариу мэдээлэл ирсэн юм болов уу?

-Гүтгэлэг. Би энэ талаар ярьмааргүй байна. Ярих ч зав алга.

-Хэргийг цагдаагийн байгууллагаас шалгаад таныг тухайн эмэгтэйн биед халдсан нь тогтоогдсон гэсэн байна. Ийм бичиг бидэнд ирсэн. Та мэдсэн үү?

-Тэгвэл та тэрийгээ нийтэл дээ. Би өөр юу гэх билээ. Гол нь тэр хүмүүс эмнэлгийн төлбөр төлөөгүй байгаа. Би бараг 100-гаад мянган ам.долларыг чөлөөлүүлсэн. Дээр нь "Өөх өгсөн хүнтэй өглөө босоод ..." гэдэг билээ. Тийм л зүйл болж байна. 

-Та тэгвэл биед халдаагүй гэдэг байр суурь дээрээ байна гэсэн үг үү?

-Гүтгэлэг. Тэрийг та өөрөө шалгаад үзсэн нь дээр байх. Харин өр төлбөр нь нэхэгдэж байгаа. Энэ нь зөвхөн Элчин сайдын яамны үйл ажиллагаанд нөлөөлөөд зогсохгүй эмнэлгийн тусламж үйлчилгээ авахаар ирсэн иргэдэд хүртэл сөргөөр нөлөөлж байна. 

-Тэр ч тэгэх байх. Гэхдээ таныг бусдын биед халдсан нь тогтоогдсон гэж Зөрчлийн тухай хуулиар 100 мянган төгрөгөөр торгох албан бичиг бидэнд ирсэн. Энэ үнэн үү?

-Төрийн албан хаагч хүн төрийн шийдвэрийг дагаж ажил үүргээ гүйцэтгэж байна. Надад заргалдах зав алга. 

Г.Нацаг