Хүүхдүүд гэртээ эргэж ирсэнгүй. Эцэг, эх, эгч, ах, дүү нь тэднийг энэ хорвоогоос ийм хурдан яваад өгчихөнө гэж даанч бодож, төсөөлсөнгүй. Гэвч нэгэнт оройтсон байв. Өглөө магадгүй өдөр нь гэрээсээ гараад тэр чигээрээ чимээгүй одсон дөрвөн амь. Сонсохоос ч гол зурж, бодохоос ч зүрх шимшрэм. Үндэсний цэцэрлэгт хүрээлэнгийн эзэмшлийн газарт үйл ажиллагаа явуулж байсан барилгын хажуугийн усан халианд 8-12 нас дөрвөн хүүхэд живж, эндсэн тухай мэдээлэл хуурай өвсөнд гал тавьсан мэт түгэж, нийгмийг цочроов.

Дэнжийн 1000 орчмоос 8-12 насны 10 хүүхэд Үндэсний цэцэрлэгт хүрээлэнд ирж, тоглож байсан гэх. Тоглох газар мундсандаа биш байхгүйдээ тэд Үндэсний цэцэрлэгт хүрээлэнг зорьсон байж таарна.

Хүүхэд болсон хойно сониуч, гэнэхэн зандаа хөтлөгдөн Туул гол дагуух Маршалын гүүрнээс зүүн тийш орших “Ханталст” компанийн эзэмшлийн газарт үүссэн усан халианд тоглосон нь дөрвийнх нь амийг авч одно гэж хэн нь ч гадарлаагүй нь лав. Үнэндээ тэднийг очиход үйл ажиллагааг нь зогсоосон гэх барилгад харуул байтугай аюултай бүс гэдгийг нь сануулах тэмдэг, тусгаарлалтын шугам ч байсангүй. Ойр хавьд нь хэн нэгэн байгаад анхааруулж, сэрэмжлүүлсэн бол хүүхдүүд тоглохгүй, дөрвөн амь эрсдэхгүй л байв. Аав, ээждээ, гэртээ тэдгээр хүүхэд очиж, дөрвөн айлын амьдрал элэг бүтэн үлдэх байлаа. Гэвч оройтжээ. Дөрвөн амь, дөрвөн гэр бүлийг өнчрүүлээд энэ хорвоогоос буцжээ. Живсэн дөрвөн хүүхдийн хоёр нь нэг айлын хоёр хүүхэд байсан гэх мэдээлэл иржээ. Гурван хүүхэд ус руу орж живж эхлэх үед нь ах нь дүүгээ аврах гэж араас нь орон амь насаа алдсан байна. 

Хотын зүгээс яаран хэвлэлийн хурал зарлаж, хэргийн гол буруутан компанийн хууль бус үйл ажиллагаатай холбоотой баримтыг дэлгэв. Нийслэлийн засаг захиргааны гурван дарга “Ханталст” компанитай холбоотой шат шатны шийдвэрүүдийг танилцуулав.

Эхлээд эмгэнэл илэрхийлэх ёстой байтал тэгсэнгүй. Сэтгэл дутав.

Тэдний тайлбарласнаар Э.Бат-Үүл нийслэлийн Засаг даргаар ажиллаж байхдаа 2014 онд захирамж гаргаж, “Хан Талст” компанид 3.36 га газар олгожээ. Гэвч “Хан талст” компани төслөө хэрэгжүүлэх явцдаа аюулгүй байдлаа бүрэн хангаагүй болохыг мэргэжлийн байгууллагын шалгалтаар илрүүлсэн байна.

Мөн “Хан Талст” компанид газар ашиглуулах тухай тогтоол нь хууль зөрчиж байна гэдгийг илрүүлж, хяналт шалгалтын явцад 84 хуудастай албан шаардлагыг хүргүүлсэн гэнэ. Тус компани ажил хийх зөвшөөрөлгүй үйл ажиллагаа явуулж байсан учраас хоёр удаа мэдэгдэл өгч, үйл ажиллагаагаа зогсоох шаардлагыг хүртэл хүргүүлсэн ч үл ойшоосоор өнөөдрийг хүрчээ. Хотоос, мэргэжлийн хяналтын байгууллагаас зохих шаардлага хүргүүлсэн бол шийдвэрийнхээ хэрэгжилтийг хангуулах талаар тухайн орчмыг эргэж, тойроод, ядаж л усан халиа үүссэн хэсгийг аюулгүй болгуулах үүднээс ажиллаж, тухайн компанид зохион шаардлага тавьж болох л байж.

Бичиг цаас хүргүүлсэн нэртэй болохоос өнөөдрийг хүртэл том толгой гаргаж ирсэн “Хан Талст” компанид төрийн төмөр нүүрийг хатуухан үзүүлсэн бол ийм харамсалтай хэрэг гарахгүй байсан нь үүгээр ойлгогдоно.

Аюулгүй байдлаа хангаагүй, зөвшөөрөлгүйгээр үйл ажиллагаа явуулсан нь тухайн компанийн 100 хувь буруу ч, аюултай орчин бий болчихоод байхад нь шаардлагатай арга хэмжээ аваагүй нь холбогдох байгууллагын алдаа, ажилдаа хариуцлагүй, хайхрамжгүй хандсаных. Төр ажлаа хэрхэн явуулж байгаагийн бодит жишээ дөрвөн хүүхдийн амиар тодорсон нь дэндүү харамсалтай бас эмгэнэлтэй.

“Ханталст” компани нь Ш.Бат-Энх гэдэг хүний нэр дээр байдаг юм билээ. Түүний эхнэр нь Хүүхдийн төлөө газрын дарга асан И.Нарантуяа.

Тэрбээр нэгэн цагт тус компанийн ТУЗ-ийн даргаар ажиллаж байсан гэдэг. Энэ тухайгаа хөрөнгө орлогын мэдүүлэгтээ ч дурдаж ирсэн байдаг юм.

Эндээс нэг асуулт гарч ирнэ. Бид хүүхдийнхээ эрүүл, аюулгүй орчинд амьдрах, өсч торних эрхийнх нь төлөө юу хийж байна вэ? Адаглаад хаана, хэнтэй, ямар орчинд тоглож байгааг нь мэддэг үү? Эрүүл, аюулгүй орчныг бүрдүүлэх нь нийслэлийн үүрэг ч, болзошгүй аюулаас урьдчилан сэргийлэх, сануулах нь эцэг, эхчүүд бидний нэн тэргүүний үүрэг биш гэж үү!? Таны хүүхэд хараа хяналтаас гадуур хаана юу хийж байна вэ? Бодох л асуудал.

С.Гандөл