Эрүүл мэндийн яамнаас коронавирусний нөхцөл байдалтай холбоотой ээлжит мэдээлэл хийлээ.

Манай улсад өнөөдрийн байдлаар 383 хүн ажиглалтад шинээр орж, хоёр хүн гэрийн тусгаарлалтад шилжжээ. Ажиглах байранд нийт 1635 хүн байгаа аж. Иргэдийн зүгээс зах, худалдааны төвийн худалдагчид маск зүүхгүй байна гэсэн гомдол их байна. Энэ хүрээнд Мэргэжлийн хяналтын байгууллагаас зах, худалдааны төвүүдээр ажиллаж, хяналт тавин ажиллана гэлээ.

Энэ үеэр бусад улсад халдварын тохиолдол ямар байгаа талаар ЭМЯ-ны Гадаад харилцаа, хамтын ажиллагааны хэлтсийн дарга мэдээлэл өгсөн юм. Тэрбээр “АНУ-д сүүлийн 24 цагийн байдлаар 16 мянган шинэ тохиолдол, 770 нас баралт бүртгэгджээ. Нийт 99 мянган хүн халдварын улмаас нас барсан гэж мэдээллээ. Тус улсын дараа Бразил улс орж байна. Өчигдөр 20.4 мянган шинэ тохиолдол, 1066 нас баралт бүртгэгдсэн байна. ОХУ-д өмнөх өдрүүдийн адил тогтвортой 8000 гаруй тохиолдол нэмэгдэж байна. Өчигдрөөс эхлэн шинж тэмдэггүй илэрч байгаа халдварыг шинэ тохиолдлын тоонд оруулахгүй байхаар болжээ.

АНУ-ын судлаач нар таргалалтын улмаас Африк гаралтай Америкчууд дунд нас баралт өндөр байна гэжээ. Судлаачдын үзсэнээр ковид19 өвчний улмаас нас барсан 10 хүнд задлан шинжилгээ хийж үзэхэд тэдний уушги цусны судасны бөглөрлөөр дүүрсэн байжээ.

Мөн нас барсан хүмүүс бүгд цусны даралт ихсэх, чихрийн шижин, хэт таргалалт зэрэг суурь өвчтэй хүмүүс байсан ба уушгины хялгасан судас бөглөрч цус алдан улмаар үхэлд хүргэсэн гэж үзжээ. Ковид19 халдвар хүндрэхэд таргалалт нэлээд нөлөөлж байна" гэлээ. 

А.Сүх