УИХ-ын гишүүн Ж.Эрдэнэбатыг цагдаан хорьсныг эсэргүүцэж, Сүхбаатар дүүргийн Эрүүгийн анхан шатны шүүхийн гадна ХЭҮК-ын дарга асан, хуульч Ж.Бямбадорж мэдэгдэл хийлээ.

Тэрбээр “Үндсэн хууль батлагдсанаас хойш 28 жилийн дараа Монгол Улсад анх удаа Үндсэн хууль зөрчсөн том үйл явдал болж байна. УИХ-ын дарга Г.Занданшатар, Дээд шүүхийн ерөнхий шүүгч Д.Ганзориг, УИХ-ын халдашгүй байдлын дэд хорооны дарга Ц.Нямдорж нарт дараах хүсэлт,  шаардлагыг хүргүүлж байна гэсэн юм.

Түүний шаардлагад:

1. Монгол Улсын эрүүгийн хуульд заасан торгох ялаас хэдэн арав дахин илүү хэмжээтэй барьцааны мөнгө тогтоож, түүнийг биелүүлэхийг даалгасан шийдвэр гаргалаа. Шүүх хууль бус тогтоогч биш хууль хэрэглэгч. Шүүхийн энэ хууль бус ажиллагааг нэн даруй таслан зогсоох.

2. Шүүх хууль бус ажиллагааг хамгаалж “Шүүхээс дуудахад хүндэтгэн үзэх шалтгаангүйгээр ирээгүй” гэж мэдэгдлээ. УИХ-ын шийдвэрээр ээлжит сонгууль зарлаж, нэр дэвшигчид 20 хүртлэх хоногт багтаж суртчилгааг хийх хуультай. Ж.Эрдэнэбат Сэлэнгэ аймагт сумуудад ажиллаж, хуульд заасан маш давчуу хугацаанд сурталчилгаа хийж явсан. Энэ тохиодолд өөр ямар хүндэтгэн үзэх шалтгаан байх билээ. Харин ч нэр дэвшигчийг хорлосон ажиллагаа болсноо хүлээн зөвшөөрч сонгогч иргэдээс уучлал гуйх.

3. УИХ-ын гишүүн Ж.Эрдэнэбатыг нэн даруй суллаж, хууль бус шийдвэр гаргасан шүүгчид ёс зүйн болон хууль зүйн хариуцлага хүлээлгэж, олон нийтэд мэдээлэх.

4. УИХ-ын халдашгүй байдлын дэд хороог цахимаар хуралдуулж дүгнэлт гаргах зэрэг шаардлагуудыг хүргүүлж байна гэжээ.