Ерөнхийлөгч асан, МАХН-ын дарга Н.Энхбаярыг авлига, албан тушаалын хэргээр ял эдэлсэн үндэслэлээр Сонгуулийн ерөнхий хороо нэр дэвшигчээр бүртгэхээс татгалзсан билээ.

Үүнтэй холбогдуулан МАХН-ын дарга Н.Энхбаяраас Сонгуулийн ерөнхий хороонд холбогдуулан гаргасан нэхэмжлэлийг тавдугаар сарын 26-ны өдөр шүүх хүлээж авч шүүхээс захиргааны хэрэг үүсгэсний дагуу Захиргааны хэргийн шүүх хурал өнөөдөр 15.30 цагт товлогдлоо. 

Н.Энхбаярын хувьд Баянгол дүүрэгт нэр дэвшихээр хүсэлтээ өгсөн. Хэрвээ түүний эл хүсэлтийг СЕХ хүлээж авсан бол Баянгол дүүрэгт гал гарсан өрсөлдөөн болох байлаа.

Нэг үгээр хэлбэл, Баянгол дүүрэгт дархлагдсан гишүүд болох АН-ын дарга С.Эрдэнэ тэргүүтэй гишүүдэд халтай сонгууль болох нь дамжиггүй байсан. Гэвч азаар гэх үү,  эзээр гэх үү, Н.Энхбаяр цагдаагийн байгууллагын тодорхойлолтоор ял шийтгэл эдэлж байсан болж таарснаар СЕХ хаалт хийхдээ тулсан юм. Түүний сонгуульд өрсөлдөх эсэхийг эцэслэн шийдэх шүүх хурал өнөдөөр ийнхүү болох гэж байна. 

Үүнээс өмнө МАХН-ын дарга тэрбээр дэмжигчдээ уриалсан нэгэн мэдээллийг хийгээд байсан юм. 

Энэ нь тус намын Ерөнхий нарийн бичгийн дарга Б.Тулга “Шүүхээс маш ойлгомжтой шийдвэр гарах ёстой. Учир нь ЦЕГ-аас Н.Энхбаярыг ял шийтгэл эдэлж байсан гэдэг худлаа тодорхойлолт гаргаж өгсөн. Монгол Улсад хүчин төгөлдөр үйлчилж буй хуулиар Улсын Дээд шүүхийн шийдвэр эцсийн байх зохицуулалттай. Гэтэл анхан шатны шүүхийн шийдвэрээр Н.Энхбаярын нэр төрд халсан. Энэ асуудал ирэх баасан гарагт эцэслэгдэн шийдэгдэнэ.

Тиймээс Баянголчууддаа, Монголчууддаа хандаж хэлэхэд МАХН-ын дарга Н.Энхбаяр нэр дэвших эрх нээлттэй боллоо. Манай намынхан одоо идэвхтэй ажилцгаах ёстой” гэсэн юм.

Харин МАХН-ын дарга Н.Энхбаяр “Намайг сонгуульд нэр дэвших эсэхийг шйидэх шүүх хурал зарлагдсаныг ард иргэд сонсоод алгаа ташиж хүлээж авсан. Тиймээс Монгол Улс даяараа “Та бидний эвсэл”-ийг дэмжиж буй ард иргэддээ баярлалаа. МАНАН арилж, нар мандахыг энэ сарын 19-нд шийднэ. Сонгогдох  эрхээ эдлэх гэж 11 жил явлаа. Харин 2020 онд миний энэ эрхийг сэргээлээ” гэж мэдэгдэж байсан юм.

Ийнхүү шүүх хурлаас хоёр хоногийн өмнө МАХН-чууд Н.Энхбаярыгаа сонгуульд нэр дэвшихээр боллоо гэж зарлаж, баярлаж байв. Тэд жинхэнэ утгаараа баярлах уу, эсвэл олон жил тээсэн горьдлогодоо цэг тавих уу гэдгийг хэдхэн цагийн дараа шийдэх гэж байна. Шүүхээс ямар шийдвэр гарах бол???.

Б.Лхам