Сүүлийн хэдэн хоногт монголчууд гэнэт ухаан орсон аятай Ерөнхий сайдыгаа эрж сурж, бөөн эрэл болов. Нээрээ юу билээ гэж бодон, халдварыг дотооддоо алдсанаас хойш хэдэн удаа олны өмнө харагдлаа хэмээн бодлоо. Хатуу хөл хорио тогтоох тэр үед Ерөнхий сайд  маань олны өмнө гарч, арван сар тэссэн ч бодит зүйлтэй нүүр туллаа. Хамтдаа энэ бүхнийг даван туулна. Засгийн газар ч чадах чинээгээрээ та бүхнийхээ төлөө ажиллана хэмээж байсныг санаж байна.

Дараахан нь арваннэгдүгээр сарын 20-доор Засгийн газрын сайд нартайгаа өргөтгөсөн хэвлэлийн хурал хийн, өөрөө хөтөлж суусан юм. За сэтгүүлч асуу, одоо сайд тэр хариул зэргээр хэдэн цагаар үргэлжилсэн хэвлэлийн хуралд тэрбээр идэвхийлэн оролцсон. Энэ үеэрээ цар тахлын үед авч хэрэгжүүлэх 23 арга хэмжээг танилцуулан “Бидний өмнө үхэх үү, сэхэх үү гэсэн хоёр л зам байна. Бид амьдрах ёстой. Бүтэн жил тэсэх ёстой.  Энэ бол дайны нөхцөл байдал. Сахилга хариуцлагатай байж чадахгүй бол, хичээхгүй бол бид олон хүний амь насыг энэ дайнд алдана. Аль болох хамгийн бага хохиролтойгоор энэ хүнд үеийг давж гарахын төлөө хамтдаа зүтгэе” хэмээж байв.

Сүржин мэдэгдэл хийж, даржин арга хэмжээ авсан хэмээн шүүмжлүүлж байсан энэхүү хэвлэлийн хурлаас хойш Ерөнхий сайд маань буцаад л нуувчиндаа орчихсон. Харин тэрбээр “Тавантолгой түлш” компанийн хоёр дахь үйлдвэрийн нээлтэд албатуудтайгаа  өчигдөр хальт харагджээ. Харж амжсан нэг нь олзуурхан та нар харсан уу, би харчихлаа хэмээн сошиалаар нэг шуугив. Эрэл сурал болоод байсан Ерөнхий сайд маань тууз хайчлан малийтал инээж зогсох юм.

Угтаа бол дотоодын халдвар өдрөөс өдөрт нэмэгдэж, иргэд нь айж түгшин, өдрийн орлогоороо амьдарч ирсэн олон мянган айл өрх идэх хоол, түлэх түлшгүй зутарч, олон зуун албан байгууллага, аж ахуйн нэгж хаалга барьсан энэ хүнд цагт Засгийн газрын тэргүүн нь хамтдаа даван туулъя гэсэн амандаа хүрч, нуугдахаасаа илүүтэй ил гарч, ард олонтойгоо хамт байж, жаргал зовлонгоо хуваалцаж суух учиртайсан. Харамсалтай нь, өөрөө уриалчихаад дайны хүнд цаг ирэхээр нуувчиндаа орж суучихаад, зарим нэг албатаа өмнөө гаргачихаад  царайгаа ч харуулахаа  болилоо.  Тиймдээ ч  “Засгийн газарт эмгэнэл илэрхийлж байна. Бид эзэнгүй айл шиг л байна. Та хаана байгаа юм бэ” гэх асуултыг монголчууд танд дайж байна. 

Үнэхээр  Монгол Улсын Ерөнхий сайд У.Хүрэлсүх та хаана байгаа юм бэ....

У.Тэргэл