Сүүлийн үед ихээхэн шүүмжлэл дагуулаад байгаа Зөрчлийн тухай хуулийг эргэн харах ёстой гэдэгт нийгмээрээ санал нэгдээд байгаа. УИХ-ын гишүүд ч хүлээн зөвшөөрч, эхнээсээ нэмэлт өөрчлөлт оруулах хуулийн төсөл санаачилжээ. Ж.Ганбаатар гишүүн энэ талаар “Зөрчлийн тухай хууль амьдралд нийцэхгүй нь эрт тодорхой болсон. Зөрчлийн тухай хуулийн торгуулийн нэгж 2000 төгрөг байсныг 1000 төгрөг болгох саналыг миний хувьд гаргаж байсан. Тэр үед өөрийгөө хамгаалах гэж байна гэж элдвээр хэлүүлэн байж батлуулсан” гэлээ.

Гишүүний хэлснээр, торгуулийн нэгжийг 1000 бус 2000 байсан бол өдгөө дийлэнх нь өрөнд баригдаж, эцэс сүүлдээ торгуулиа төлөх мөнгөгүйн улмаас шоронд орох байв.

Нэг жилд л 17 тэрбумаар торгож байгаа юм. Хоёр дахин нэмбэл аймшигтай тоо гарна. Энэ бүхнээс харахад, иргэдийн халаас хоосорч, төрд итгэх итгэл алдарч, харин эсрэгээрээ улсын төсөв зузаарах байжээ. Иргэн, аж ахуйн нэгж, байгууллагыг хуулийг хэрэгжүүлж эхэлсэн өнгөрсөн гурван жилийн хугацаанд 174 тэрбумаар торгосон байдаг. Тэгвэл энэ тоог хоёроор үржүүлбэл, 350 орчим тэрбум төгрөгөөр төр төсвөө зузаатгахаар байжээ.

НИТХ ч энэ удаад нийслэлийн төсвийнхөө тодорхой хувийг иргэдээ торгож бүрдүүлэхээр тооцсон байна. Харамсалтай нь, өмнөх жилд 40 тэрбум байсан бол өдгөө 60 тэрбумыг нийслэлчүүдээ торгож олохоор төлөвлөжээ. Энэ мэтчилэн иргэдийн халааснаас төсөв бүрдүүлэх гэдэг төрийн арчаагүй шийдвэрийг хэзээ таслан зогсоох юм бол оо.

У.Тэргэл