УИХ-ын ээлжит чуулганаар Монгол Улсын засаг захиргаа, нутаг дэвсгэрийн нэгж түүний удирдлагын тухай хуулийн шинэчилсэн найруулгын хуулийн төсөл болон хамт өргөн мэдүүлсэн хуулийн төслийн эцсийн найруулгын зарчмын зөрүүтэй саналаар санал хураалаа. Энэ үеэр гишүүдийн хэлснийг онцлон хүргэе.

Г.Аматүвшин: Нийслэл, дүүрэг, сумдын засаг захиргааныхан хамтын ажиллагааг хөгжүүлж байгаа нэрийн дор гадаад, дотоод руу зугаалж эхнэр, хүүхдийнхээ захиасыг авчрах гээд дэлгүүр хэсээд явж байдгаа зогсоомоор байна. Төвлөрсөн гадаад бодлого гэж байдаг. Түүнийхээ дагуу л баймаар байна. Тиймээс хуулийн төслийн 77.8 заалтын найруулгыг өөрчил.

Б.Пүрэвдорж: Сүүлийн хоёр сонгуульд АН арчаагүй байсны дүнд МАН олонх болсон. Хэт олонх болсны зовлонг үүрээд явж байна. Хууль тогтоох байгууллагад олонх болсон. Гүйцэтгэх засаглал 100 хувь МАН-ынх, дээр нь шүүх засаглалыг өөрсдөдөө авахаар хуулийн төсөл хийгээд явж байна. Мөн албан бусаар дөрөв дэх засаглал гэж ярьдаг хэвлэлийг дуугүй болгосон. Одоо ХЗДХ-ийн сайд нь иргэдийн үгийг хаах хуулийн төсөл боловсруулаад явж байна. Бүх түвшинд нь амыг нь хаах бодлого явж байгаа.

Өнөөдөр энэ хуулиар нутгийн өөрөө удирдах ёсыг уландаа гишгэсэн хэд хэдэн заалтыг оруулж байгаа.

Дээд шатны дарга Ерөнхий сайд нь аймгийн Засаг даргыг санал болгоно, шалтгаангүй буцаана, дахин тухайн хүнийг нэр дэвшүүлэхгүй гэдэг нутгийн өөрөө удирдах ёсонд харш заалт явж байна. Төрийн олон чиг үүрэг дээрээсээ томилгоотой болсон. Улмаар босоо тогтолцоотой социалазмын үе рүү бүх шатандаа Монгол Улс орж байна. Тиймээс АН өөдтэй байх хэрэгтэй байна. Өнөөдрөөс эхлээд эв нэгдлээ хангаж, илүү зохион байгуулалтад орох шаардлага урган гарч байна.  

 Б.Лхам