Күнзийн хэлсэн энэ мэргэн үгийг БНХАУ-ын дарга Ши Жиньпин өдгөөгөөс жил орчмын өмнө манай улсын Ерөнхийлөгчөөр дамжуулан Монголын ард түмэнд хандан хэлсэн юм. БНХАУ-д 2019 оны арванхоёрдугаар сард анх дэгдсэн “Ковид-19”-ийг ДЭМБ пандеми буюу цар тахал гэж зарлахаас хоёрхон долоо хоногийн өмнө буюу 2020 оны хоёрдугаар сарын 27-нд Монгол Улсын Ерөнхийлөгч Х.Баттулга урд хөршид айлчилж байх үеэр гэсэн үг л дээ. Дандаа л хандив, тусламж авч ирдэг төрийн айлчлалуудаас энэ удаагийн Ерөнхийлөгчийн айлчлал ялгарч байсан нь мөнхийн хөршдөө тахлыг даван туулахад зориулж 30 мянган толгой хонь бэлэглэсэн явдал байсан юм. Монгол Улсын Ерөнхийлөгчийн ард түмнийхээ нэрийн өмнөөс бэлэглэсэн бэлгийн хариуд БНХАУ-ын дарга Ши Жиньпин Күнзийн дээрх сургаалийг эшлэн, талархсанаа илэрхийлж байв.

Хонин сүргийг цуглуулахаас эхлээд хорио цээр, халдвар хамгаалалт гээд олон шат дамжлагын эцэст 30 мянган хонин өнгөрсөн арав, арваннэгдүгээр сард багтаан БНХАУ-д хүлээлгэн өгсөн. Үүнтэй зэрэгцээд шахуу манай улс дотооддоо цар тахлыг алдаж Хятадын Хубэй мужийнхан оношлуур, аппарат, цайг 30 мянган хонины хариу талархал болгон Улсын ерөнхий комисст бэлэглэж байлаа.

Харин мөнхийн хөршдөө халуун хошуут малаар бэлэг барьсан төрийн тэргүүний бэлгийн хонин сүргийг цуглуулахад аймаг, сумд эрвийх дэрвийхээрээ оролцсон. Тэр аймгийн тэр сумын малчин тэдэн хонь хандивлалаа гэдэг мэдээлэл Ерөнхийлөгчийн урд хөршид хийсэн айлчлалаас хойш олон гарч байсныг уншигчид санаж байгаа байх. Харин 2.5 сая хувьцаа эзэмшигчтэй “Эрдэнэс Тавантолгой” ХК нь энэ бэлгийн хамгийн том хандивлагч байсан гэдгийг шинэ оны босгон дээр мэдэж авлаа.

Тус компанийн тайлангаас харвал төрийн тэргүүний бэлгийн хонийг худалдан авах зардалд зориулаад “Эрдэнэс Тавантолгой” компани 1 сая ам долларыг хандивлажээ.

Энэ бол одоогийн ханшаар хоёр тэрбум 850 сая төгрөг гэсэн үг. Нэг хонийг дундажаар 180-200 мянган төгрөгөөр тооцвол “Эрдэнэс Тавантолгой” компани  Ерөнхийлөгчийн бэлгийн тал хувийг гаргажээ гэсэн үг. Өнгөрсөн аравдугаар сард төрийн тэргүүнээс аж үйлдвэрийн гавьяат ажилтны цол тэмдгээ гардан авсан Б.Ганхуяг захирлын үед “Эрдэнэс Тавантолгой” компани улс орны эдийн засагт хөгжил авчрах олон төслүүдийг санхүүжүүлж байгаа.

 Монголын үндэсний аж ахуйн нэгжүүдээс анх удаа нэг тэрбум ам долларын борлуулалтын орлоготой, нэг их наяд гаруй төгрөгийн ашигтай ажилласан тус компани 2.5 сая иргэнд анх удаа 1072 хувьцааны ногдол ашгийг хүртээж, Тавантолгой-Зүүнбаян, Тавантолгой-Гашуунсухайтын чиглэлийн төмөр зам, Тавантолгойн цахилгаан станц, Улаанбаатар хотын утааг бууруулах сайжруулсан түлш зэрэг томоохон бүтээн байгуулалтын ажлыг санхүүжүүлж байгаа билээ. 

С.Сүлд