Эмч эмнэлгийн ажилтнууд “Эрүүл мэндийн сайдаа үлдээе” гэсэн хөдөлгөөнийг өнөөдрийн 08 цагаас хойш Сүхбаатарын талбайд өрнүүлээд байна.  

Өнөөдөр эрүүл мэндийн салбарт ажиллаж буй эмч, эмнэлгийн ажилтнуудын төлөөлөл уг хөдөлгөөнд оролцож байгаа ба ээлжнээсээ буусан эмч, сувилагч, ажилтнууд шууд энд ирснээ хэлж байв.

Хөдөлгөөнд оролцогсод “Эрүүл мэндийн сайд шинэчлэлийг энэ салбарт зоригтой хийсэн. Залуу эрчтэй хүний хувьд ажлыг нь хийлгэх ёстой, Гэмтлийн эмнэлэг, Улсын клиникийн төв эмнэлэг өмнө ямар байсан, одоо ямар болов. Нүдэн дээр илт байна. 20 гаруй жил мэргэжлийн бус сайдууд энэ салбарт ажилласан.

Харин Т.Мөнхсайхан сайд богино хугацаанд маш их зүйлийг хийсэн. Хөнгөлөлттэй эмийг бүр эмийн сангаар олгож байгаа, энэ салбарт бугшсан булхайг илчилсэн, нийслэл, орон нутагт PCR шинжилгээний лабораторийг байгуулсан гээд сайд болсноосоо хойш зургаахан сарын дотор хийсэн ажил их.

Тиймээс энэ салбарт ажиллаж буй 57 мянган эмч, эмнэлгийн ажилтнууд түүнийг огцруулахыг хүлээн зөвшөөрөхгүй. Сайд болсон анхны өдрөө  гаргасан тушаал нь ажилтнуудад олгох урамшуулал байсан. Ерөнхий сайд эрүүл мэндийн салбарын ажилтнуудын хүсэлтийг хүлээн авна гэж найдаж байна” гэв. 

Эрүүл мэндийн салбарын төлөөлөл болох 1000 гаруй хүн өглөөний байдлаар тайван жагсаалд оролцон, үзэл бодлоо илэрхийлж байна. Цагдаа нар тэдний барьсан лоозонг хураан, хөдөлгөөнийг тараахыг оролдон, тэдгээрийн хооронд  багахан мөргөлдөөн үүссэн юм. Тайван жагсаал Ерөнхий сайдыг эцсийн шийдвэр гаргатал үргэлжлэх юм байна.

У.Тэргэл