Архидан согтуурсны улмаас гэр бүлийн хүчирхийлэл гаарч, хүний санаанд оромгүй хэрцгий хэргүүд гарах боллоо. Өчигдөр гэхэд л, Сонгинохайрхан дүүрэгт 31 настай эмэгтэй О нь согтуурсан үедээ өөрийн аав  59 Ш-ийн хэвлийн тус газарт, нөхөр 30 настай Г-ийн зүүн гарын шуунд хутгалж, гэмтэл учруулсан байна. Эмэгтэй хүн согтуугаар ийнхүү танхайрч, төрсөн, эцэг, нөхрөө хүндээр гэмтээж байдаг. Тэгвэл өнгөрсөн долоо хоногт нэгэн ноцтой, сэрдхийм хэрэг гарсан юм. Орон сууцанд гал гарч, нэгэн эмэгтэй шатаж, амиа алдсан харамсалтай хэргийн дуудлагыг холбогдох газарт ирүүлжээ. Дуудлагын дагуу цагдаагийн байгууллагынхан хэргийн газарт очих үед тус байранд амьдардаг, 23 настай эмэгтэй шатаж нас барсан байдалтай олдсон байна. Талийгаачийн цогцост гаднын нөлөөтэй байж болзошгүй гэмтэл, бэртэл байсан ба хэргийг нарийвчлан шалгахад түүний нөхөр болох 30 настай эрэгтэй талийгаачийн хоолойг боож, амь насыг нь хохироон, хэргийн ул мөрөө баллахын тулд хувцсыг нь шатааж, гал тавьсан болох нь баримтаар тогтоожээ. Хамгийн хэрцгий нь, гал тавьчихаад хэргийн газраас зугтахдаа эхнэрийнхээ дэргэд ой нэг сартай хүүгээ орхиод явсан байжээ. Азаар гал гарч байгааг мэдсэн хөрш нь гэрт орж, хүүгийн амийг аварсан байна. Хэрэгтэн ч архи, согтууруулах ундаа хэрэглэсэн үедээ гэр бүлийн маргааны улмаас эхнэрийнхээ амийг хөнөөсөн болохоо хүлээсэн байна. Азаар эсэн мэнд гарсан балчир хүүг улсын асрамжид өгч, сэжигтэнг саатуулан шалгаж эхэлжээ.

Согтуугаар гэр бүлийн хүчирхийлэл үйлдэж, үйлдэл нь улам бүр харгис, хэрцгий болж, залуужиж байгаа нь хууль, хүчнийхнийг түгшээж эхэлсэн. Нийгмээрээ яагаад ийнхүү харгис хэрцгий зам руу дөтлөөд байна вэ. Гэр бүлийн хүчирхийлэл гэж ярьж байгаа ч бодит амьдралд өдөрт хэдэн арваараа хүчирхийлэлд өртөн олон эмэгтэй, балчир үрс маань эрүүл мэнд, сэтгэл санаагаараа хохирч, тахир дутуу болж, амь насаа хүртэл алдаж буйд төр, засгаас хуулийн хариуцлагыг чангатгах хүртэл арга хэмжээ авахыг шаардахаас аргагүй байдалд хүрч байна.

У.Тэргэл