Нийслэлийн Өргөө амаржих газарт амаржсан эмэгтэйд хүнлэг бус хандаж халаад, тавчиктай нь амыг нь боогоод хүүхэдтэй нь авч явсан асууал цахим сүлжээнд тарж иргэдийн дургүйцлийг өдөөсөн билээ. Улмаар иргэд тайван жагсаал хийж Засгийн газар нь хариуцлага хүлээж танхимаараа огцорсон нь саяных. 

Түүнчлэн Өргөө амаржих газрын дарга Г.Баясгалан, Нийслэлийн эрүүл мэндийн газрын дарга Л.Төмөрбаатар нарыг албан тушаалаас нь чөлөөлүүлэх хүсэлт гаргасан ч Өргөө амаржих газрын дарга Г.Баясгалан өөрийгөө чөлөөлөгдөх үндэслэлгүй гэж үзэн шигдэн суугаа сурагтай.

Салбарын сайд нь хүртэл өөрийн хүсэлтээр чөлөөлөгдөх хүсэлт гаргаж байхад эсрэгээрээ Г.Баясгаланд бол сэтэрээ л хамгаалж үлдэж байвал хүн чанар, ёс зүй гээч зүйл хамаагүй бололтой.

Ер нь тухайн өдөр болсон явдал дан ганц эмч нар гэлтгүй төрийн албан хаагчдын анхаарал, хайхрамжгүй байдал, хүнд суртлын нэг хэсгийг л харуулсан гэхэд болно. Эмнэлэгт нь халдвартай эх төрсөн сургаар түргэн явуулахаа бодсоноос биш хучаад тэргэн дээр суулгаад аваад явах наад захын ухамсар, мэдлэггүй хүнээс энэ эмнэлгийг өөд татна гэж найдалтгүй л байх. 

А.Сүх