Төр өмчдөө эзэн суух цаг ирсэн тухай монголчууд  олон жил ярьж, шаардаж ирсэн. Энэ дагуу “Эрдэнэт үйлдвэр”-ийг  Монгол Улсын Засгийн газар 2019 оны гуравдугаар сарын 21-ний өдөр  тогтоол гаргаж, Төрийн өмчит үйлдвэрийн газар болгон өөрчилж, дүрмийг баталсан.  Үүний үр шимийг ч монголчууд өдгөө эдэлж суугаа. 

“Эрдэнэт үйлдвэр”-ийн 49 хувьтай холбоотой асуудлыг эцэслэн шийдвэрлээгүй байгаа ч дахин нэг дуулиан дэгдсэн нь тус үйлдвэрийн 100 хувийн хөрөнгө оруулалтаар боссон “Эрдэнэт-Медипас” оношилгоо, эмчилгээний төвийг “менежментийн хувьчлал” нэрийдлээр нэгэн овжин нөхөр үнэгүй хувьчилж, өөрийн болгожээ.

49 сая ам.долларын өртгөөр боссон тус эмнэлгийг Франц, Японы хамгийн сүүлийн үеийн өндөр хүчин чадалтай оношилгоо, шинжилгээний аппарат, тоног төхөөрөмжийг суурилуулсан ба дэлхийн стандартад нийцсэн гэдгээрээ Монголдоо толгой цохих эмнэлгийн нэг болсон учиртай. 300 ортой тус эмнэлгийг  2016 онд ашиглалтад оруулсан бөгөөд 6800 метр.кв долоон давхар барилга, байгууламжтай, 200 автомашины зогсоолтой, дэд бүтцийг цогцоор нь шийдсэнээрээ ихээхэн давуу талтай юм.

“Эрдэнэт үйлдвэр” ТӨҮГ болж, төр өмчдөө эзэн суусан нь сайшаалтай ч тус байгууллагын 100 хувийн хөрөнгө оруулалтаар боссон, эрдэнэтчүүдийн ганц том хөрөнгө болох  “Эрдэнэт-Медипас” эмнэлгийг хувийн болгон маадайж суугаа эрхэм хэн бэ. 130 тэрбумын өртөгтэй эмнэлгийг “бэлгэнд” авах ямар гавьяа байгуулсан болоод тэр вэ. 

Төрийн өмчит үйлдвэрийн 100 хувийн хөрөнгөөр боссон гэдэг утгаараа төр өмчдөө авах учиртай. Төрийн өмч гэдэг нь ард түмний өмч юм. Менежментийн хувьчлал нэрийдлээр  бүхэл бүтэн эмнэлгийг “бэлгэнд” авсан энэ “но”-той, “ноцтой” асуудлыг холбогдох байгууллагууд нь шалгаасай.

У.Тэргэл