Ерөнхий сайд Л.Оюун-Эрдэнэ болон Шадар сайд, УОК-ын дарга С.Амарсайхан нар УОК-ын Шуурхай штабт ажиллаж байна.

Энэ үеэр Шуурхай штабын дэргэдэх Эрдэмтдийн зөвлөлийн гишүүн, МУИС-ийн Физикийн тэнхимийн эрхлэгч, дэд профессор Д.Улам-Оргих "Судалгаа шинжилгээний багийн зүгээс бүх зүйлд шинжлэх ухааны үндэслэлтэй хандах хэрэгтэй гэж үзэж байгаа. Хэрэв ингэсэн тохиолдолд коронавирусний цар тахлаас айх зүйлгүй. Нөгөө талаас мөн үл хэрэгсэж бас болохгүй. Энэ долоо хоногийн бямба гарагаас эхлэн 16 хоног хөл хориог тогтоох зайлшгүй шаардлагатай байна. Хөл хорио тогтооно гэдэг нь амаргүй. Гэхдээ нөхцөл байдал зайлшгүй шаардаж байгаа юм.

Хоёрдугаар сарын 6-наас эхлэн 21-нийг дуустал хөл хорио тогтоох шаардлагатай. Ингэхдээ нэлээд хатуу тогтоох хэрэгтэй. Тодруулбал хөл хориог 90 хувь бууруулах ёстой. Ингэж байх өвчлөлийг барьж чадах боломж бүрдэнэ. Харин үүний дараа арай сулруулж хөл хорио тогтоох хэрэгтэй гэж үзэж байгаа. Ер нь хөл хориог хэт удаан эсвэл хэт богино хугацаанд тогтоох нь үр ашиггүй. Тиймээс долоо хоног амраад, долоо хоног ажилладаг байх нь кластер халдварыг барих боломжийг бүрдүүлэх юм. Үүнийг Засгийн газар анхааралдаа авч ажиллах хэрэгтэй байна. Үүнийг УИХ-ын гишүүдээс эхлээд ард иргэд нийтэд ойлгуулж, таницуулах шаардлагатай байгаа юм. 

Хөл хорио тогтоохгүй бол гуравдугаар сард эмнэлгийн ачаалал 3000 болж,  дийлэхгүйд хүрнэ. Ингэвэл хүнд өвчтөнийг эмчлэх, гэрт нь хорих гэхчилэн олон улсын жишигт орно. Энэ үед нийт өвчлөгсдийн хоёр хувь нь амиа алдах тооцоолол бий. Үүнийг хүсэх зүйл биш. Эдийн засаг ч мөн маш хүнд байдалд орно.

Хэрэв хөл хориог тогтоовол эмнэлгийн ачааллыг 1000 орчимд барина. Бүх тооцооллыг олон улсын жишгээр хийж байгаа" гэлээ.

Ерөнхий сайд Л.Оюун-Эрдэнэ "Бид үүнийг цогц шийдэл гэж харж байна. Эрдэмтэн судлаачдынхаа үгийг бид сонсож, ажил хэрэг болгох болно. Бид нөхцөл байдалд автах бус удирдан чиглүүлэх ёстой. Цагаан сарын үеэр хөл хөдөлгөөн ямар байх, ямар шийдвэр гаргавал эрсдэлээс хэрхэн сэргийлж чадах зэрэг маш нарийн тооцооллуурыг хийх хэрэгтэй. Ер нь бид жадныхаа үзүүрийг бус гүнд нь хатгаж байж, энэ бүхний ард гарах учиртай. Цаг агаар дулаарч, хуурайшилт ихсэх үед нөхцөл байдал хэрхэн өрнөх гээд бүх зүйлийг нарийн судлаж, төлөвлөгөө гаргах хэрэгтэй. Шадар сайд эрдэмтдийнхээ үгийг сайн сонсож ажил хэрэг болгох нь чухал. Цар тахал эдийн засаг хоёр нэг зүйл. Үүнийг салгаж харж болохгүй" гэлээ.

Б.Баатар