Дүүгээ харамсалтайгаар алдсан нэгэн залуу манайд хандсан юм. Түүнийг Цэгмидийн Ганзориг гэдэг.  Түүнтэй ярилцсанаа хүргэе.

-Та юуны учир Ерөнхий сайд болоод Эрүүл мэндийн сайдад хандах болов?

-Баянгол дүүргийн Эрүүл мэндийн  долоодугаар төвд  өглөө 08 цагт үзүүлэхээр очсон дүүгийнхээ цогцосыг шөнийн 24 цаг гэхэд эмнэлгээс авч гарсандаа үнэхээр гомдолтой байна. Энэ талаар Ерөнхий сайд болоод Эрүүл мэндийн сайдад хандсан. Дүүд маань анхан шатны тусламжийг яаралтай үзүүлээгүй алгуурласнаас амь насаа алдсанд үнэхээр харамсаад баршгүй. Ийм золгүй явдал хэн нэгэнд дахин бүү тохиолдоосой гэсэндээ энэ бүхнийг дэлгэж, сэрэмжлүүлэхийг хүссэн юм.

-Дүү тань ямар зовиуртайгаар эмнэлэгт анх очсон юм бэ. Чухам юу болсон талаар ярьж болох уу?

-Гүрээнийх нь хавьд судас хатуураад байхаар  үзүүлэхээр эмнэлэгт очсон байсан. Манайд гүйлсэн булчирхайн хорт хавдраар өвчилсөн тохиолдол бий. Тиймээс урьдчилан сэргийлж, эмнэлэгт үзүүлэхээр шийдсэн юм билээ. Тодруулж яръя.  Дүү маань 2021 оны нэгдүгээр сарын 25-ны өглөө 08 цагт Баянгол дүүргийн Эрүүл мэндийн төвийн долоодугаар төвд эхнэрийн хамт  очсон. Тус төвийн хүлээн авах тасгийн эмч дүүг маань үзээд амин үзүүлэлт хэвийн, зүгээр байна. УОК-ын шийдвэр гарсан. Эхлээд Ковидын шинжилгээ өг гээд шинжилгээний хариу гартал хүлээж бай гээд нэг өрөөнд оруулчихсан гэсэн. Хамт байсан эхнэрийг нь сургуулиас нь дуудаад  (багш юм) орондоо хамт ажилладаг багшаа гуйж үлдээсэн байдаг. Ингээд өглөө ирсэн хүнийг Ковидын шинжилгээ авчихаад хүлээлгээд байхаар нь нөгөө багш  эмэгтэй “Энэ хүнийг яагаад үзэхгүй байгаа юм бэ” гэсээр 280 мянгаар томограф, хэвлийн эход харуулсан байсан.  Гэтэл Аззаяа гэж эмч мэс заслын нэг эрэгтэй, бас нэг эмэгтэй эмчийг дуудан гурвуулаа зөвлөлдсөнөө “Хоёр бөөр ажиллагаагүй болсон байна. Бөөрний дутагдалд оржээ” гээд гемодиализийн аппаратад оруулах шаардлагатай гэсэн юм билээ. Намайг яарсаар очиход эмч нь шаардлагатай зүйлсийг авчир гэхэд би “Монос”-оос 400 гаруй мянган төгрөгийн  эм, тариа, гуурс авч очсон. Эмчилгээг хийж байна, бөөрний 75 хувь, үгүй бол 50 хувь сэргэдэг зүгээр гэж Аззаяа эмч хэлсэн. Тэгээд гэртээ хариуд удаагүй байтал эмнэлгээс 22 цагийн үед залгаад “Та яаралтай ирээч” гэхээр нь очтол дүүд маань хүчилтөрөгчийн аппарат залгачихсан байсан. Удалгүй дүү маань амьсгал хурааж,  Аззаяа эмч ТҮЦ-ээс сүү аваад ир. Бас бид хоёр цагийн дараа цэвэрлэгээ, ариутгал хийх ёстой гэсэн. Ийм л харамсалтай явдал боллоо.

-Гүрээ хавьд нь хөндүүрлээд түүнийгээ үзүүлэхээр ирсэн залуу гэнэт хоёр бөөр нь ажиллагаагүй болж, эцэстээ амиа алдсан гэсэн үг үү?   

-Зовиурлаж байгаагүй дүүгийн маань хоёр бөөр ажиллагаагүй болж таарсан. Камерийн бичлэгт зүв зүгээр яваад ОО өрөө орж байгаа юм. Задлан шинжилгээгээр бөөр эрүүл гэж гарсан. Харин эмч нар хордлогын улмаас хоёр бөөр ажиллагаагүй болдог гэсэн. Үнэхээр тийм байсан бол тэд шуурхай арга хэмжээ аваагүй. Бүхэл өдөр ковидын шинжилгээний хариу хүлээнэ гээд өрөөнд хорьчихсон. Эцэстээ шинжилгээ өгч, арга хэмжээ авсан ч дэндүү оройтсон байсан.  Хамгийн гол нь Аззаяа эмч цагдаа нарт миний дүүг согтуу байсан гэж хэлсэн байгаа юм.

-Яагаад согтуу байсан гэж. Өөрөөсөө асуудлыг зайлуулах санаатай байсан юм болов уу?

-Цагдаа нар асуудлыг тодруулдаг юм билээ. Гэтэл Аззаяа эмч арьсаа хамгаалах гэсэн үү, дүүг маань согтуу байсан гэж мэдүүлсэн байсан. Тиймээс энэ бүхний учрыг олох гэж салбарынх нь сайдад, цаашлаад Ерөнхий сайдад хандсан. Хамгийн аймшигтай нь, ганц тэр өдөр гэхэд л Эрүүл мэндийн тус төвд дөрвөн хүн амиа алдсан. Дүү маань 47 настай ид залуугаараа. Ард нь насанд хүрээгүй хоёр хүүхэд, бэлэвсэн эхнэр нь үлдэж байна. 

-Та бүхэн эмнэлгийн удирдлагуудтай уулзаж үзэв үү?

-Одоогоор амжаагүй л байна. Тэгээд ч Баянгол дүүргийнхэн дээд, дунд, доод шатандаа халаа, сэлгээ хийж, сандал ширээгээ зөөж,  бужигнаж байгаа. Биднийг эмнэлэгт байхад дарга нь болов уу гэмээр хижээл эмч тэндхийн ажилтай танилцаад явж байсан. Шинэ дарга нь юм болов уу гэж ойлгосон. Бидний гомдож байгаа нь, хордлого ч бай, хордлогын улмаас бөөр ажиллагаагүй болсон ч байсан яаралтай арга хэмжээ авах байсан. Залуу эмч нар туршлагагүй байж болно. Тэгвэл зөвлөх, профессор, доктор гээд байгаа. Тэднээсээ яагаад зөвлөгөө авч болоогүй юм бэ.

-Та Ковидын шинжилгээний хариуг нь авсан уу?

-Харамсалтай нь, нас барсных нь дараа 24 цагийн орчимд Ковидынх нь шинжилгээний хариу сөрөг гарсан байсан.  

 -Та Ерөнхий сайд, Эрүүл мэндийн сайдад хандлаа. Хариу өгөх болов уу. Ийм тохиолдол олон байдаг?

-Хүний алтан амь юунаас ч үнэтэй. Бид тус төвийн эмч нарыг шууд утгаараа буруутгаагүй. Залуу эмч нар алдсан байж болно. Гэхдээ энэ хариуцлагагүй байдал даамжирвал олон хүний аминд хүрнэ. Дүү маань босч ирэхгүй ч гэсэн олон хүнийг энэ зовлонгоос сэрэмжилж чадвал гэж л бодсон юм.

Эрүүл мэндийн салбар ковид гэсээр бусад өвчтөнөө зөнд нь орхиж, амь насыг нь эрсдэлд оруулж байна хэмээн УИХ-ын гишүүд шүүмжилж байсан. Дээрх явдал үүнийг баталж байна. Хамгийн аймшигтай нь, тус төвд нэг өдөрт 4-5 хүн амиа алдсан байгаа юм. Эмч нар буруутай юү, шуурхай арга хэмжээ аваагүйгээс залуугийн амь нас эрсдсэн үү, үнэхээр хоёр бөөр нь ажиллагаагүй байв уу, хордлогын улмаас гэнэт үүссэн хүндрэл үү гэдэг олон асуулт удахгүй тодорхой болно. Энэ бүхний дараа хариуцлагын асуудлыг шат шатанд ярих нь тодорхой юм.

У.Тэргэл