Хэдхэн хоногийн өмнө дөнгөж төрсөн эхийг коронавирусний халдвартай гэх шалтгаанаар нярайн хамт өөр эмнэлэг рүү тээвэрлэхдээ ХӨСҮТ-ийн баг алдаа гаргаж, хөхөө өвлийн хүйтэнд нимгэн хувцастай гаргаж олны дургүйцлийг төрүүлсэн. Дээрх асуудлын дуулиан намжиж амжаагүй байтал ХӨСҮТ-ийнхэн дахин алдаа гаргав.

Ясны хорт хавдартай 16 настай С.Ханатбек хүү яаралтай хагалгаанд орохоор тусгай үүргийн онгоцоор өнгөрсөн Бямба гаригт Сөүлийг зорьсон байна. Тэрбээр Турк улс руу явахынхаа өмнө ХӨСҮТ-д Covid-19 халдварын шинжилгээ өгч, тодорхойлолт авчээ. Гэвч ХӨСҮТ-ийн эмч, ажилтан шинжилгээний хариуг "negative", "positive" гэсэн олон улсын стандартаар бус, "Not detected" гэж бичээд зогсохгүй тухайн хүүхдийн нэр, төрсөн он, сарыг нэрийг алдаатай бичсэн аж.

Энэ хариуцлагагүй үйлдлээс болж хүнд өвчтэй хүү транзит нислэгт сууж чадалгүй саатаж, хоног хугацаа алдсан талаарх мэдээлэл цахим орчинд олон нийтийн сэтгэлийг сэрд хийлгэв.

С.Ханатбек авга ах нар ХӨСҮТ-д гомдолтой байгаагаа илэрхийлэв

Хүүгийн биеийн байдал болоод шинжилгээний бичиг зөрсөн талаар авга ах нараас нь тодрууллаа.

С.Ханатбекийн авга ах Х.Өнер "Миний дүү С.Ханатбек 2020 оны гуравдугаар сард эмчилгээ хийлгэж эхэлсэн. Монголдоо "Гэмтэл согог судлалын үндэсний төв"-д хэд хэдэн удаа хагалгаанд орж, химийн эмчилгээ хийлгэж байсан. Сөүл-Доха-Истанбул чиглэлийн тусгай үүргийн онгоцоор өнгөрсөн Бямба гаригт буюу нэгдүгээр сарын 30-нд Монголоос явж, Сөүл хотын Инчеон нисэх буудалд гацсан. Уг нь нэгдүгээр сарын 31-ний шөнө 00:00 цагт Истанбулын онгоцонд суух ёстой байсан ч бичиг баримтын зөрчилтэй буюу ХӨСҮТ-ийн алдаанаас болж онгоцондоо сууж чадаагүй. Би өнөөдөр ХӨСҮТ-ийн эмч нарын гаргасан алдааг нь залруулж, бичиг баримтыг нь и-мэйл хаягаар явууллаа. Би дахин С.Ханатбек хүү эцэг, эхийн нэр дээр онгоцны тийз бичүүлж, түр байрласан буудлын зардлыг нь нэмээд 4.8 сая төгрөг төлсөн. Эмч мэргэжилтнүүдийн хариуцлагагүй байдлаас болж, дүү маань хоног хугацаа алдаж, эрүүл мэнд, эдийн засгаараа хохирлоо. Дүү маань өвчин намдаах тариа хийлгэхгүй л бол өвчин нь зовиурлаж, хүнд байгаа" гэдгийг учирлав.

С.Ханатбекийн авга ах Х.Аманболд “Монголын эрүүл мэндийн салбарын хариуцлагагүй байдлаас, тэр дундаа ХӨСҮТ-ийн алдаанаас болж дүү минь ийнхүү хугацаа алдаж, онгоцны буудал дээр хоёр хоног саатлаа. Түүний эмчилгээний зардлыг босгохын тулд зарахаа зарж, зээл хийж, сүүлдээ хандивын аян хүртэл зохион байгуулсан. Гэтэл одоо ийм байдал үүсээд байна” гэсэн юм.

ГССҮТ-ийн эмч Н.Оюунжаргал С.Ханатбекаас шинжилгээ аваагүй байж худал хэлсэн нь өвчин хүндрэх шалтгаан болжээ

С.Ханатбекийн өвчиний талаар тодруулбал, 2020 оны арванхоёрдугаар сарын 05-нд Ховд аймгийн БОЭТ-ийн шийдвэрээр ХСҮТ-ийн хүлээн авах тасагт шилжүүлэн тус эмнэлэгт гурав хоног хэвтэн шинжилгээ өгөхөд хавдрын ямар нэгэн шинж тэмдэггүй хэмээн ГССҮТөв рүү шилжүүлэхийг зөвлөсөн байна.

Улмаар ГССҮТ-д хоёрдахь удаа хагалгаанд ороход эрхий хурууны хэмжээний эд авсан эдийн шинжилгээ хийлгэх шаардлагагүй, хоргүй гэх тайлбарыг ар гэрийнхэнд нь өгчээ. Гэтэл Ховд аймгийн гэмтлийн эмч Н.Бэрхбол энэ талаар лавлахад ГССҮТ-ийн эмч Н.Оюунжаргал "шинжилгээ аваагүй" гэдгээ хэлсэн байна. Энэ нь өвчин даамжрах эх үүсвэр тавигдсан гэдгийг хүүгийн ар гэрийнхэн хэлж байгаа юм.

Улмаар 2020 оны арванхоёрдугаар сарын 18-нд Улсын хоёрдугаар төв эмнэлэгт хувиараа үзүүлж MRI шинжилгээ хийлгэхэд хавдартай байж магадгүй гэж яаралтай хэвтүүлж, Биопсийн шинжилгээ өгөхөд "Ясны Хавдар буюу Ewing's Sarcoma" гэж оношлогдсон аж.

Тиймээс 2021 оны нэгдүгээр сарын 08-нд ЭХЭМҮТ-ийн Цусны эмгэг, Хавдар судлалын тасагт хэвтэн гуравдахь удаагийн хими эмчилгээгээ хийлгэн энэ оны нэгдүгээр сарын 27-ны өдөр гарч, Турк улсын зорьсон нь энэ юм.

Учир нь Турк улсын "Мемориал Анкара" эмнэлгийн хүүхдийн хавдарын профессор Ахмет Демир эмч хүүг эмчлэх боломжтой гэх хариуг ирүүлж, хүлээж авахаар болсон байна. Харин хүүгийн эхний 4 курс эмчилгээнд 40.000 ам.доллар буюу 114 сая төгрөг бөгөөд гэр бүлийнхэн нь хандивын аян өрнүүлж, бүхий л боломжоо шавхаж, хүүг эмчилгээнд явуулсан ч ХӨСҮТ-ийн эмч нарын алдаанаас болж, цаг алдаа хэмээн халаглаж сууна.

Б.Баатар