ШӨХТГ-аас цэнхэр, ягаан тасалбарын хувьцаатай холбоотой асуудлыг эцэслэн шийдвэрлэхээр ажиллаж эхэлжээ. Энэ талаар ШӨХТГ-ын дарга Б.Бат-Эрдэнэ “Хувьцаатай хэрнээ түүнийгээ мэддэггүй, хувьцаатай хэрнээ ногдол ашиг авдаггүй, хувьцаатай хэрнээ байршсан мөнгөний хүүгээ  ч нэхдэггүй хүн олон. Байгалийн баялгаас эзэмших ёстой хувьцаагаа  (Эрдэнэс Тавантолгойгоос бусад) тоодоггүй, араас нь явдаггүй, хувьцааны мэдээллийг өгөх ёстой газар нь мэдээлдэггүй энэ асуудалд манай байгууллага  2021 ондоо багтааж, цэг тавина. Бид маш хатуу байр суурьтайгаар хувьцаа эзэмшигч иргэд, ард, түмнийхээ талд байж, энэ ажлыг шийднэ. Санхүүгийн зохицуулах хорооны нөхөдтэйгөө цаашдын төлөвлөгөө, хамтын ажиллагаа, зарчмын асуудлаа тохирлоо.Цаашдаа ч ажлаа зогсоохгүй” гэлээ.

Энэ монголчуудад сайхан мэдээ. Өнөөдрийн байдлаар, 1991-1994 оны хооронд авсан цэнхэр, ягаан тасалбартай 250 мянга орчим иргэний найман тэрбум орчим төгрөг хуримтлагдаж байгаа юм.  Мөн нэгж хувьцаанд ногдож байсан үнийн дүнгээс хамаарч арван мянга хүртэлх төгрөгтэй 70 мянга орчим харилцагч байгаа бол 10 сая төгрөгтэй ч хүн бий аж. Харин иргэд тоомжиргүй зангаасаа болж цэнхэр, ягаан тасалбартай эсэхээ мэддэггүй, мэдсэн ч тэгтлээ ач холбогдол өгдөггүй нь энэ талын мэдлэг дутмагтай холбоотой юм байна. Тиймээс иргэд  https://net.schcd.mn/registration/default.jsp хаягаар орж, регистрийн дугаараараа цэнхэр, ягаан тасалбартай эсэхээ шалгаж болох бөгөөд аль нэг брокер диллерийн компанид данстай бол тухайн компанитайгаа холбогдон бүхий л мэдээллээ авах боломжтой юм байна. Хамгийн гол нь цэнхэр, ягаан тасалбарыг  өв залгамжлалаар авч болно. Дээр хэлсэн сайтад өв залгамжлалын маягт гэж бий бөгөөд  түүнийг бөглөөд шаардлагатай бичиг баримтыг бүрдүүлснээр гэр бүлийн гишүүн нь хувьцааны ногдол ашгийг авах эрх үүсэх юм.

У.Тэргэл