Монгол Улсад коронавирусний нийт батлагдсан тохиолдол өчигдрийн байдлаар 1832 болоод байгаа. Сүүлийн өдрүүдэд хүн амын дундаас халдвар илэрч байгаа нь халдвар ард иргэдийн дунд хөнгөн балархай хэлбэрээр тархсан байгаагийн илрэл гэдгийг албаныхан анхааруулж байгаа.

Эрүүл мэндийн яамны дэргэдэх Эрдэмтдийн зөвлөлөөс энэ сарын 6-ны өдрөөс 21-ний өдрийг хүртэлх хугацаанд хөл хорио тогтоох шаардлагатай байгааг онцолж буй.

Хэрэв үгүй бол "Гуравдугаар сард эмнэлгийн ачаалал 3000 болж, коронавирусний халдвар дийлэхгүйд хүрнэ. Ингэвэл хүнд өвчтөнийг эмчлэх, гэрт нь хорих гэхчилэн олон улсын жишигт орно. Энэ үед нийт өвчлөгсдийн хоёр хувь нь амиа алдах тооцоолол бий. Үүнийг хүсэх зүйл биш. Эдийн засаг ч мөн маш хүнд байдалд орно" гэдгийг онцгойлон анхааруулсан.

Шадар сайд С.Амарсайхан “Эрдэмтдийн зөвлөлөөс гаргасан саналыг үндэслэж Улсын Онцгой комисс үр дүнтэй шийдвэрүүдийг гаргах боломж бүрдэнэ” гэдгийг онцлон тэмдэглэсэн байдаг.

Тэгвэл Улсын Онцгой комиссын өчигдрийн хуралдаанаар хатуу хөл хориог хоёрдугаар сарын 10-наас эхлэн 20 хүртэл тогтоох санал гаргасан байна. Улмаар уг саналыг өнөөдрийн Засгийн газрын хуралдаанаар эцэслэх юм. Харин Засгийн газар энэ удаад УОК-ийн саналыг хэрхэн шийдэх нь олны анхаарлыг татаж буй юм. Ямартай ч Шадар сайд эрдэмтдийн саналыг үндэслэн шийдвэр гаргаж. 

Харин өмнө нь буюу нэгдүгээр сарын есны өдөр Эрдэмтдийн зөвлөлөөс мөн л хөл хориог сулруулж болохгүй гэдгийг мэдэгдэж байсан ч тухайн үед Шадар сайд Я.Содбаатар нар тэдний үгийг үл "тоосон".

Тодотговол, эрдэмтдийн зөвлөл хөл хориог одоо сулруулбал хоёрдугаар сарын эхээр халдварын тоо нэмэгдэж, өдөрт 100 хүртэл хүн өвчлөх магадлалтай. Тиймээс хөл хориог сулруулж болохгүй. Өвлийн улиралд халдварын тархалтыг хумиж авахгүй бол хавар байдал улам хүнд болно" гэдгийг хэлсэн байдаг. Гэхдээ тухайн үед эдийн засаг хүнд байдалд байсан. Иргэдийн амьжиргаа зэргээс шалтгаалж, хөл хориог сулруулсан гэдэг. Гэсэн ч үүний үр дүн өдгөө гарч, өдөрт халдварын тоо 30 хол даван бүртгэгдэж буй юм.

Харин энэ удаад шинэ Засгийн газар Эрдэмтдийн зөвлөлийн саналыг ажил хэрэг болгохоор шийдсэн бололтой. 

Р.Алтан