Менежментийн хувьчлал нэрийдлээр төрийн өмчийг үнэгүйдүүлж хувьдаа авдаг жишиг Монголд тогтлоо. Бид өмнө нь “Эрдэнэт-Медипас” эмнэлгийг  “Эрдэнэт” үйлдвэрийн (хуучнаар) охин компани болох “Медипас”  ХХК хууль бусаар хувьдаа авсан талаар мэдээлж байсан. Харин өдгөө энэхүү өмч хөрөнгийн маргаан Сингапурын Арбитрын шүүх дээр очих болоод байна. Тодруулбал, “Эрдэнэт” үйлдвэрийн захирал асан Ц.Даваацэрэн 2015 оны есдүгээр сарын 25-нд ”Эрдэнэт-Медипас” эмнэлгийг менежментийн хувьчлалаар Японы хөрөнгө оруулалттай “Медипас” ХХК-д өгсөн байдаг.  

Монголын талаас менежментийн хувьчлалыг хууль бус гэж үзсэн тул 64,8 тэрбум төгрөгийн хөрөнгийг эргүүлэн авах гэрээг цуцлах асуудлаар хууль хяналтын байгууллагад хандаад байгаа юм. Харин  Японы хөрөнгө оруулалттай “Медипас” ХХК-ийн зүгээс Сингапурын Арбитрын шүүхэд хандан, уг асуудлаар гомдол гаргаад байна.

Нийтдээ 49 сая ам.долларын хөрөнгөөр боссон, Япон улсын орчин үеийн тоног төхөөрөмжөөр иж бүрэн тоноглосон, 300 ортой дэлхийн хэмжээний стандартын эмнэлгийг хууль бусаар хувьчилсан захирал асан Ц.Даваацэрэнд ямар эрх ашиг байгаа болоод ийм шийдвэр гаргасан. Эсвэл авлига, албан тушаалын томоохон наймаа байна уу гэдгийг Авлигатай тэмцэх газраас шалгаж байгаа тул удахгүй тодорхой болно. Харин Сингапурын Арбитрын шүүхэд “Эрдэнэт үйлдвэр”-тэй цаашлаад Монгол Улстай холбоотой өмч хөрөнгийг маргааныг хэлэлцэх товыг удахгүй зарлана гэсэн мэдээлэл байна.

   У.Тэргэл