Эрүүл мэндийн яам өнгөрсөн хугацаанд сайн, муу, сайшаал, хараал бүгдийг л хүртлээ. Монгол Улс тэр дундаа ЭМЯ цар тахалтай анх удаа нүүр тулж байгаа болохоор амжилттай давж гарахын тулд бүхий л хүчээ дайчилсан. Үүнийг үгүйсгэхгүй. Гэвч төрийн байгууллагад нугалаа гаргах, идэж завших, шаардлагатай бараа материалыг  “агаар”-ын үнээр худалдан авч, дундаас нь ашиг орлого олох гэсэн хомхой сэтгэлтэн олон. Ийм явдал Халдвар ЭМЯ-ыг  ч тойрсонгүй. Учир нь, тэд коронавирусний халдварыг далимдуулан PCR шинжилгээний гол хэрэгсэл  болох модон бамбарыг зах зээлийн үнээс асар өндөр үнээр,  бүр үйлдвэрээс нь бус ченжээс худалдан авчээ. Цаашлаад нэн шаардлагатай оношлуурын бусад багаж,  түргэвчилсэн оношлуурын тестийг хүртэл зуучийн компаниар дамжуулан өндөр үнээр худалдан авсан байна. Ченж, зуучийн компаниар бараа  бүтээгдэхүүн үйлдвэрээсээ  хэд дахин, бүр хэдэн зуу дахин нугалсан үнээр ирдгийг хэнбугай нь ч мэднэ.   

Харин энэ талаарх нотлох баримтыг “Шилэн”-ээрээ нийгэмд  танигдсан Цогтгэрэл ил болгон, уг асуудлыг шалгуулахаар хууль хяналтын байгууллагад ханджээ. Тодруулбал, тэрбээр нэгдүгээр сарын 2-ны өдөр Эрүүл мэндийн яамны удирдлагуудыг АТГ-т шалгуулахаар гомдол гаргасан бөгөөд ямар үнэтэй барааг хэдэн зуу нугалсан үнээр ченж, зуучийн компаниас худалдан авсан талаарх баримтыг хавсарган холбогдох газарт нь өгчээ.  

Коронавирусний халдварын оношилгоо, шинжилгээнд шаардлагатай оношлуур, багаж, төхөөрөмжийг авахад Төрийн сангаас хэчнээн төгрөг гаргуулсан, түүнийхээ  хэдээр нь хэрэгцээт зүйлсийг авсан,  хэчнээнийг нь “халаасласан” болохыг АТГ шалгаж, удахгүй тогтооно биз ээ.

Харамсалтай нь, цар тахлын хүнд энэ цагт ЭМЯ-ныхан бидний төлөө хоол ундаа умартан, цаг наргүй ажиллаж байна хэмээн монголчууд урам өгч, сэтгэлээр дэмжиж байсан. Гэтэл тэд иргэдээ бус өөрсдийнхөө эрх ашгийг давхар “хавчуулж”  байжээ. Тиймдээ ч иргэд эвгүйцэхийг үл  тоон амнаас бус хамраас шинжилгээ авах болхи бүдүүн бамбарыг сонгожээ. Төрийн сангаас гаргуулсан мөнгийг бүхэлд зөв, хэрэгцээт зүйлд бодитоор зарцуулсан бол өнөөдөр иргэд шинжилгээ өгөх гэж айдас хүйдэстэй байхгүй, бас PCR шинжилгээний бамбар дууслаа, тасарлаа гэх бэрхшээлийг  үзэхгүй байсан буй заа.

У.Тэргэл