Монголын Үндэсний Бөхийн Холбооноос Цагаан сарын барилдааныг зохион байгуулах санал гаргасан. Харин УОК энэ жил барилдааныг зохион байгуулах нь эрсдэл ихтэй гэдгийг хэлж, зохион байгуулахгүй гэдгийг мэдэгдсэн билээ.

Тодруулбал, Шадар сайд С.Амарсайхан "Бөхийн холбоо, орон нутгийн иргэдээс үндэсний бөхийн барилдаан зохион байгуулъя гэсэн саналаа бидэнд ирүүлсэн. Харин УОК шаардлагагүй, боломжгүй гэж үзсэн. Цол хэргэм олгохгүй учир бөхчүүд энэ шийдвэрийг ойлгон хүлээн авч байгаа гэдэгт эргэлзэхгүй байна. Бид болгох талаас нь судлаж үзсэн ч бүх нийтийн хорионы үеэр шаардлага байхгүй гэж холбогдох байгууллагын саналд үндэслэн шийдсэн. Бүх эрсдэлээ даван гарсны дараа олон сайхан боломж бидэнд нээгдэх учир энэ удаад зохион байгуулахгүй нь зөв гэж үзлээ" хэмээсэн.

Тэгвэл өнөөдөр Монголын Үндэсний Бөхийн Холбооноос дахин хүсэлт гаргаж, Сар шинийн барилдааныг хөдөө орон нутагт үзэгчгүйгээр барилдааныг зохион байгуулахыг хүсчээ.

Тодотговол, Монголын Үндэсний Бөхийн Холбооны тэргүүний үүрэг гүйцэтгэгч Ц.Магалжав "Улаанбаатар хотын засаг дарга бөгөөд нийслэлийн онцгой комиссын дарга Д.Сумьяабазарт албан бичиг хүргүүлж, бөхийн барилдаанд оролцох бөхчүүдийг Битүүний өдөр Улаанбаатар хотоос гарч нисэх онгоцны буудлаас Говь-Алтай аймаг руу нисэх хөдөлгөөн, мөн өдрийн орой ирэх хөдөлгөөнийг цар тахлын үеийн дүрэм журмын дагуу шийдвэрлэж өгөхийг хүссэн байна. 

Уг албан бичигт: "Улаанбаатар хотын засаг дарга бөгөөд нийслэлийн онцгой комиссын дарга Д.Сумьяабазар танаа

Хүсэлт гаргах нь,

Монгол түмний уламжлалт сар шинийн бөхийн барилдаан цар тахлын улмаас Улаанбаатар хотод хөл хориог тогтоохтой холбогдуулан УОК-оос зохион байгуулагдах боломжгүйг зарлалаа. Дэлхий нийт энэхүү шинэ төрлийн цар тахлыг сөрж, түүнтэй зохицон амьдрах хэв маягт орж байгаа үед Монгол улс тодорхой оновчтой шийдэл огт үгүй байж хөл хориог олон сараар тогтоож, соёл урлаг, спортын арга хэмжээнүүд зохион байгуулагдахгүй болж байгаа нь нийгэмд эерэг уур амьсгал үгүй болж, бухимдал, архидалт, хүчирхийлэл улам ихсэж байгааг та бид бүхэн бүгд мэдэж байгаа.

Олон зуунаас уламжилж ирсэн Сар шинийн баяр нь Монгол түмний сайн сайхны эхлэлийн билэгдэл болж байдаг тул олон нийт, бөхчүүд энэхүү өдрийн барилдаанд ихээхэн ач холбогдол өгч байдаг. МҮБХ нь Сар шинийн барилдааны талаар 2021 оны нэгдүгээр сарын 8-ны өдөр Монгол Улсын Шадар Сайд бөгөөд УОК-ын даргад албан ёсоор хандаж түүний дагуу УОК-ын Шуурхай штабаас зохих заавар, зөвлөгөөг аван хэрэгжүүлж ажилласан.

Үүний дагуу барилдах бөхчүүд болон ажиллах жаяг дэгийн баг болох нийт 190 хүний тусгаарлагдах байр, хоол, бусад зардлыг шийдвэрлээд байлаа. Давагдашгүй хүчин зүйл болох цар тахлын голомт нь Улаанбаатар хотод тодорхойгүй шалтгааны улмаас нэмэгдсэнтэй холбогдуулан барилдаан зохион байгуулагдахгүй болсон тул энэхүү барилдааныг цар тахлын голомтгүй орон нутагт үзэгчгүйгээр зохион байгуулах санал гаргаж байна.

Иймд НОК-оос МҮБХ-нд сар шинийн барилдаанд цахимаар барилдахаар бүртгүүлсэн 128 бөх, орон нутагт очиж ажиллах жаяг дэг, шууд дамжуулах ТВ-ийн ажилтан болох нийт 140 хүний шинжилгээг 2021 оны хоёрдугаар сарын 10-ны өдөр Монгол бөхийн өргөөнд авах, 2021 оны хоёрдугаар сарын 11-ний өдөр Улаанбаатар хотоос гарч нисэх онгоцны буудлаас Говь-Алтай аймаг руу нисэх хөдөлгөөн, мөн өдрийн орой ирэх хөдөлгөөнийг цар тахлын үеийн дүрэм журмын дагуу шийдвэрлэж өгөхийг хүсье.

Жич: Орон нутагт зохиогдох барилдааны бүх зардлыг МҮБХ бүрэн хариуцах бөгөөд нислэгийн хоёр онгоцны захиалгыг өгсөн байгаа болно.

Таныг хүндэтгэсэн, Тэргүүний үүргийг гүйцэтгэгч Ц.Магалжав" гэсэн байна.