УИХ-ын гишүүн Т.Доржханд  2021 оны нэгдүгээр сарын 18-ны өдөр мэдээлэл хийж, Ерөнхийлөгчийн сонгуулийн тухай хуулийн эргэлзээтэй зарим зүйл заалтыг нэг мөр болгох, хуульдаа тодорхой зааж өгөх ёстой гээд энэ асуудлаар Үндсэн хуулийн Цэцэд хандаж байгаагаа мэдэгдсэн юм. 

Тэрбээр “Ерөнхийлөгчийн сонгуулийн тухай хууль Үндсэн хуультайгаа нийцэж байна уу. Өмнөх Ерөнхийлөгч нар дахин сонгуульд нэр дэвших үү.  Үндсэн хуульдаа бол нэр дэвших боломжгүй гээд тов тодорхой заачихсан. Тиймээс энэ асуудлаа Ерөнхийлөгчийн сонгуулийн тухай хуульд тодорхой зааж өгөх ёстой гэж үзэж, Үндсэн хуулийн Цэцэд иргэний журмаар хандаж байна”хэмээн мэдэгдсэн билээ.

Монгол Улсын Ерөнхийлөгч зөвхөн нэг удаа зургаан жилээр сонгогдоно гэдэг заалтыг Ерөнхийлөгчийн сонгуулийн тухай хуульд тусгаагүй. Энэ зүйл заалтыг 2025 онд хэрэгжүүлнэ гэж байгаад нааш нь татаж,  2021 оны тавдугаар сарын 25-наас хэмээн өөрчилсөн нь элдэв маргааны эхлэл болоод байгаа юм.

Тодруулбал, МАН, ХҮН өмнө Ерөнхийлөгч байсан эрхмүүд дахин нэр дэвших эрхгүй хэмээж байгаа бол АН-ын лидерүүд болох Р.Амаржаргал, З.Энхболд, Р.Гончигдорж нар одоогийн Ерөнхийлөгч Х.Баттулгыг 2021 оны Ерөнхийлөгчийн сонгуульд нэр дэвших эрхтэй хэмээн мэдэгдээд байгаа юм. Энэ мэт эрхтэй ,эрхгүй гэсэн маргааныг өдгөө Үндсэн хуулийн Цэц л хагалах учиртай. Ерөнхийлөгч Х.Баттулгын хувьд Үндсэн хуулийн Цэцийн шийдвэр түүний ганц итгэл, найдвар болоод байна.

Ерөнхийлөгч Х.Баттулгын хувьд бол бүх зүйлээрээ ч болов дэнчин тавиад Монгол Улсын Ерөнхийлөгчийн сонгуульд дахин өрсөлдөх чин хүсэлтэй байгаа. Үүнийхээ төлөө Үндсэн хуулийн Цэцэд ч “шахалт” үзүүлээд эхэлсэн тухай яригдах болсон.  Хэдийгээр Хөх тэнгэрийн дээр зөвхөн Цэц гэдэг ч өдгөө Ерөнхийлөгч Х.Баттулгын “найраа” тэнд орчихсон яваа хэмээн дуулдах боллоо. Ямартай ч, Цэц ямар шийдвэр гаргана дагаад улс төр өрнөнө гэдэг л тов тодорхой байна.

У.Тэргэл