Эрүүл мэндийн яаман дээр урд шөнө 02.00 хүртэл бөөн асуудал болж, Шадар сайд, ЭМЯ-ны сайд гээд бусад албан тушаалтнуудын  хооронд ширүүхэн маргаан дэгджээ. Энэ нь хоёрдугаар сарын 11-нээс тогтоох хатуу хөл хорионы үеэр авах арга хэмжээтэй холбоотой аж. Тодруулбал, нийт 420 мянган өрх бүрийн нэг гишүүнээс арав хоногийн хугацаанд коронавирусний шинжилгээ авах ажлыг зохион байгуулахаар болсон билээ. Ингэж байж халдварын тархалтыг хумьж авна хэмээн НОК шийдэж, иргэд ч энэ удаад нэг амьсгаагаар халдварыг дарж авах нь зүйтэй хэмээн хүлээн зөвшөөрөөд байсан юм.   

Гэтэл Эрүүл мэндийн яам нь үүнд ямар ч бэлтгэлгүй байгаа аж. Тус яамнаас дүүрэг бүр PCR шинжилгээний лабораторитой боллоо. Цаашид хөдөө, орон нутагт байгуулна хэмээн сүртэй зарлаж байсан бол өдгөө лабораторийн асуудал хүнд байна. Юун 420 мянган  өрх. Ядаж 100 мянгаас  нь авъя хэмээн шалдаа бууж байгаа аж.

Энэ байдлаас харвал, ЭМЯ өнгөрсөн хугацаанд урд хормойгоороо хойд хормойгоо нөхөж явж иржээ. Шинэхэн сайд С.Энхболдыг буруутгах хэцүү ч өмнөх удирдлагууд нь нөөцөө ч бэлдээгүй, нөхцөл байдал хүндрэхэд ямар арга хэмжээ авах талаарх төлөвлөгөө, бэлтгэл байхгүй байсан нь үүнээс харагдаж байна.  

Нийслэлийн онцгой комисс бүх нийтийн бэлэн байдлыг дэглэмийг хэрхэн хангах, хатуу хөл хорионы үеэр ямар арга хэмжээ авах талаарх бүхий л төлөвлөгөө, зураглалыг нарийвчлан гарган боловсруулж, бэлтгэл ажлаа хангаад байхад харин иргэдийг  шинжилгээнд хамруулах үүрэгтэй ЭМЯ нь хоосон хоёр гараа өргөөд ямар ч боломжгүй хэмээгээд сууж байх юм. Тэд шинжилгээ авахад шаардлагатай филтертэй хошуу, эффендорф тюб бараг байхгүй, хайгаад олдохгүй байгаа. Аргаа бараад Хятадын баталгаагүй хошуунууд хэрэглэхдээ тулж байна” хэмээжээ. 

Нийслэлийн онцгой комиссын хувьд коронавирусний халдварыг хумих сүүлчийн боломж энэ хэмээн үзэж, бүхий л хүчээ дайчилж байгаа бол ЭМЯ-ны унхайгүй байдлаас болж бүх өрхийг шинжилгээнд хамруулах ажил бүтэлгүйтэж мэдэхээр байна. 
 

У.Тэргэл