Нийслэлийн Эрүүл мэндийн газар 20 мянган  ширхэг N95 амны хаалтыг 400 сая төгрөгөөр худалдан авах тендерийг гурав хоногийн хугацаатай зарласан нь өнгөрсөн амралтын өдрүүдийн гол сэдэв байлаа.

Энэ нь олон нийтийг бухимдуулж, Хотын дарга ч тендерийг ЭМЯ-нд буцаахыг НЭМГ-т даалган, хувийн ашиг сонирхол байгаа гэж харж байгаагаа тов тодорхой хэлсэн.

Мөн тэрбээр хотын даргын ажил авахаас өмнө хийсэн бүх худалдан авалтыг шалгуулах үүргийг өгсөн юм. Энэ зөвхөн эхлэл юм. Цаашлаад ЭМЯ өнгөрсөн хугацаанд шаардлагатай тоног төхөөрөмж, оношлуурыг үйлдвэрээс нь бус зуучийн компаниас хэд дахин өндөр үнээр худалдан авсан талаарх баримтыг “Шилэн Цогоо” шалгуулахаар АТГ-т хандаад байгаа юм.

Харин энэ удаад Засгийн газар цар тахлын үед хийсэн төрийн бүх шатны худалдан авалтыг шалгуулахаар Авлигатай тэмцэх газарт хандлаа.

Хамгийн гол нь, худалдан авалтыг богино хугацаанд зарлаж байгаа нь ашиг сонирхлын  зөрчил бийг харуулж байна. Нөгөөтэйгүүр, өмнө тохирчихдог,  тендер зарласан нэрийдлээр өгч, авалцдаг ийм луйвар цар тахлыг далимдуулж газар авчээ гэсэн хардлагыг ч төрүүлж эхлээд байгаа юм.

Ямартай ч, төр, засаг, Хотын дарга, хувь хүн гээд бүгдийн анхаарал эрүүл мэндийн салбарын худалдан авалт, тендертэй холбоотой асуудал руу чиглэж, холбогдох газарт шалгуулахаар хандсан нь томоохон дэвшил юм.  

У.Тэргэл