Эрүүл мэндийн салбарынхны үнэн нүүр царай коронавирусний халдварын цар тахалтай тэмцэх үед илчлэгдлээ хэмээж байгаа ч хөгжил дэвшил мөн зэрэгцэж явна. Өчигдөр гэхэд л Монгол Улсын Ерөнхийлөгчийн зарлигаар эрүүл мэндийн салбарын дөрвөн бүтээлд Төрийн шагнал хүртээсэн билээ.

Бас нэгэн сайхан мэдээ бол, УИХ-аар Эрүүл мэндийн даатгалын сангийн тухай хуулийг баталснаар цалингаасаа эрүүл мэндийн даатгалын шимтгэл төлдөг иргэдэд ихээхэн боломжийг нээж өгчээ.

Цалингаасаа эрүүл мэндийн даатгал төлдөг иргэн нэг жилд хоёр сая төгрөгийн үйлчилгээг авах эрхтэй, хязгаартай байсан. Тодруулбал, 10-15 жил эрүүл мэндийн даатгал төлж ирсэн иргэн зүрхний хагалгаанд гэнэт орох болбол 10 сая төгрөг шаардлагатай. Энэ нь иргэдийг санхүүгийн дарамтад оруулах нь элбэг. Ийм тохиолдолд хоёр саяыг Даатгалын сангаас, харин үлдсэн найман саяыг иргэн өөрөөсөө гаргадаг гажиг тогтолцоотой явж ирсэн юм.

Харин Даатгалын сангийн тухай хуулийг шинэчлэн баталснаар энэхүү шударга бус тогтолцоог халж, эрүүл мэндийн даатгал төлдөг л бол эмнэлгийн бүхий л тусламж үйлчилгээг Даатгалын сангаас  төлөхөөр болж байна.

Тодруулбал, эрүүл мэндийн үйлчилгээг мөнгөнд баригдахгүйгээр, хязгаарлалтгүйгээр авдаг болсон гэсэн үг юм.

Иргэд өвдөхгүй л бол хэдэн жилд ч эрүүл мэндийн тусламж, үйлчилгээг авдаггүй. Харин эрүүл мэнддээ анхаарсан ийм иргэдийг урамшуулах эрүүл тогтолцоо манайд байхгүй. Гэвч алхам алхмаар урагшилж, эрүүл мэндийн даатгал төлдөг бол хувь, улсын гэх дурын эмнэлгээсээ одоо тусламж, үйлчилгээ авдаг боллоо. Өмнө дүүргийнхээ эрүүл мэндийн төв, нэгдсэн эмнэлгээр үйлчлүүлдэг. Сонголт байхгүй байсан бол энэ удаад гэрийнхээ ойролцоох эмчилгээ, үйлчилгээ сайтай ямар ч эмнэлгээр үйлчлүүлж болох нь.

Бас нэгэн хөшүүрэг нь, иргэдийн сонголт болж байна. Цалингаасаа даатгал төлдөг иргэн хувь, хувьсгалын эмнэлгийн аль сайныг нь сонгож үйлчлүүлэх боломжтой юм. Олон хүн үйлчлүүлснээр Даатгалын сангаас тэр хэрээр мөнгө орж ирнэ. Харин үйлчилгээ, эмчилгээ муутай эмнэлгээр иргэд үйлчлүүлэхээс зайлсхийснээр тухайн эмнэлэг эдийн засгийн хувьд эрсдэлд орох юм. Тиймээс өвчтөнөө, үйлчлүүлэгчээ хэрхэн татахад менежментийн болоод тоног төхөөрөмжийн, зан харилцааны гээд бүхий л  шинэчлэлийг нэвтрүүлж, өрсөлдөхөөр болж байна. Энэ нь эрүүл мэндийн салбарт маш том өөрчлөлтийг авчирч буй юм. 

У.Тэргэл