Төв талбай дээр 34 настай иргэн амиа хорлосон харамсалтай хэрэг гарсан билээ. Тухайн иргэнд анх тусламж үзүүлж, амийг нь аврахыг оролдсон Сүхбаатар дүүрэг дэх Цагдаагийн нэгдүгээр хэлтсийн цагдаа, цагдаагийн дэд ахлагч Б.Даваажавын ээж цахим хуудснаа сэтгэгдлээ бичжээ. 

Тэрбээр "Хүүгээрээ бахархаж байноо. Аварч чадаагүй ч гэсэн хичээсэн. Бензин биш байсан бол аварч болох байсан гэж бодож байна.

Бид 2 уг нь бусдын л адил хүүгээ БНХАУ-д дунд сургуульд сургаж, Монголдоо Их сургуульд сургаж хятад хэлтэй эдийн засагч болгосон. Гэтэл мэргэжлээрээ хэдхэн сар ажиллаад би өөрийнхөө сонирхлоор явъя даа аав ээж 2 минь гээд цагдаа болсон хүн дээ. Өчнөөн жил сургасан байхад мэргэжлээрээ явсангүй гээд бид 2 их л дурамжхан байдаг байлаа. Өнөөдрийн үйл явдлыг хараад шатсан хүнд л харамсаж байснаас биш хүүгээ бол үүрэгээ гүйцэтгэж байгаа цагдаагийн албан хаагч л гэж харж байлаа. Өмнө нь хүний амь аварч л байсан. Энэ удаагийнх олны нүдэн дээр болсоноороо л арай өөр. Бид ч нээх ч сүртэй юм бодсонгүй.

Гэтэл харин орой хүүгээ хиншүү хярвас үнэртүүлээд их гунигтай ороод ирэхэд л хараад гэнэт өрөвдлөө бас бахархлаа. Цагдаа нар маань үргэлж л үүрэг гүйцэтгэж байдаг. Тэдний ажлын хүндийг ойлгох хэрэгтэй юм байна.

Шатаж байгаа хүний хувцсыг тайлах боломж яагаад ч байхгүй юм байна гээд аавтайгаа ярьж сууна. Тэрхэн хооронд бензинтэй хувцасыг нь тайлчихвал ч гэж бодоод амжсан бололтой. Хайран залуу гээд их л харамсаж байна"