Говь-Алтай аймгийн Шарга сумын харьяат  21-хэн настай залуу Дорноговь аймгийн Хилийн цэргийн 0129 дүгээр ангид алба хааж байхдаа 2021 оны хоёрдугаар сарын 7-ны өдөр харамсалтайгаар амиа алджээ. Түүнийг гэрээслэл бичин амиа хорлосон хэмээн тус ангийн удирдлагууд ар гэрийнхэнд нь хэлж, цогцсыг нь хүргүүлэхэд талийгаачийн ар гэрийнхэн болоод Шарга  сумын иргэд эсэргүүцэн эмээл, хазаараа бэлдэн эх орноо хамгаална хэмээн хилийн цэрэгт явсан залуу юуны учир амиа хорлох болов хэмээн амийг нь нэхэн жагсч байна.

Хилийн цэргийн  0129 дүгээр ангийн Штабын дарга Г.Золзаяа, Ц.Эрдэнэ нараас ямар их дарамт, яргалал байгаа болоод эрүүл саруул байсан хүү  өөрийгөө дүүжлэн амиа хорлох болов. Эх орноо хамгаална хэмээн инээмсэглээд явсан хүүгийнхээ цогцсыг бид яагаад авах гэж хэмээн Шарга сумынхан жагсч, бодит байдлыг хэлэхийг шаардаж байна. Харамсалтай нь, Хилийн цэргийн 0129 дүгээр ангийнхан хүүг өөрийгөө боомилон амиа алдсан байхыг бид олсон. Аав, ээждээ “Хүү нь түрүүлээд явлаа” хэмээн гэрээслэл бичин үлдээсэн  гэдгээс өөрийг хэлж чадахгүй байна.

Нутгийн иргэд арга ядаад бичсэн гэрээслэлийг нь үзье, бид бичгийг нь мэднэ, үнэнийг хэлэх эр зориг алга уу. Хилийн цэрэг яргаллын үүр уурхай болсон юм уу хэмээн шаардаж, бодит  байдлыг мэдэхийг хүссэн ч Хилийн цэргийн 0129 дүгээр ангийн удирдлагууд бодит байдлыг ар гэрийнхэн болоод нутгийн олонд хэлэхгүй. Задлан шинжилгээний хариуг үзүүлэхгүй, нэг нэгэн рүүгээ асуудлыг бухаж байгаад Шарга сумынхан гомдолтой байна.

 Хүү хамгийн сүүлд гэрийнхэн рүүгээ залгаад “Намайг эндээс аваач ээ” гэдгээс өөрийг хэлээгүй байна. Учрыг нь олоогүй аав, ээж нь хүүгээ хилийн цэргээс шантарч дээ. Удахгүй эргэж очъё хэмээн ярилцаж байтал удалгүй хүүгийнх нь цогцсыг хүргэж иржээ.

Харамсалтай энэ явдал анхных, бас эцсийнх биш.

Дорноговь аймгийн Хилийн цэргийн 0129 дүгээр ангийн захирагч, удирдлагууд, цаашлаад ХХЕГ эрүүл саруул хүү эх орныхоо дархан хилийг хамгаална гэж яваад амиа алдсан энэ хэрэгт тодорхой хариулт өгнө гэж найдъя.  Харин бодит үнэнийг олтлоо эсэргүүцлээ зогсоохгүй, хүүгийнхээ амийг нэхсээр байх болно гэдгийг Шарга сумынхан хэлж байна.

У.Тэргэл