Өчигдөр 5 шар чиглэлийн автобусад зорчигчоос халдвар илэрч, автобусыг тусгаарласан талаар бид мэдээлсэн. Тэгвэл автобуанд зорчигчдыг зургаан цаг гаруй хүлээлгэж, шинжилгээний баг очжээ.

Хамгийн ноцтой нь халдвартай байж болзошгүй иргэнийг гадаа хүйтэнд 3-4 цаг ганцааранг нь хашаа руу харуулан зогсоосон гэх мэдээлэл цахим сүлжээнд тархаж, иргэдийн дургүйцлийг өдөөгөөд байна.

Өвчин хэлж ирэхгүй, хийсэж ирдэг. Дээр нь агаар дуслын замаар хэн ч өвчлөх боломжтой атал халдвар авсан иргэдийг гэмт хэрэгтэн мэт үзэж буй гэх.

Цар тахлын энэ үед хүний эрхийн ноцтой зөрчлүүд ар араасаа гарсаар байхад хүний эрхийг хангахын төлөө ажиллана хэмээн тангараг өргөсөн нөгөө таван гишүүн хайчив.

Өнгөрөгч сар гэхэд л дөнгөж төрсөн эмэгтэйд хүнлэг бус хандсан асуудал гарсан. Энэ талаар хэвлэл мэдээлэл олон нийт иргэдийн анхааралд хүргээгүй бол мэдэхгүй л өнгөрөх байсан. Энэ үед ч та бүгд дугараагүй. Улсын төв талбайд иргэн амьдаараа зулын гол боллоо. Ямар шалтгааны улмаас иргэн өөрийгөө егүүтгэх болсон талаар хуулийн байгууллага шалгаж, эцсийн дүгнэлтийг гаргах ёстой ч та бүгдийн дуу хоолой ч мөн чухал. Гэсэн ч тэд бүгд чимээгүй өнгөрөв. Тэд хаана байна вэ.

А.Сүх