УИХ-ын гишүүн С.Ганбаатарын цочроо өгсөн “мэдэгдэл” уршиг тарьж эхэллээ. Тэрбээр “Оюутолгой” төсөлтэй холбоотой асуудлаар Төв талбайд нойтон өлсгөлөн зарлаж, эсэргүүцлээ илэрхийлсэн. Энэхүү эсэргүүцлийг нь төр, засаг хүлээн авахгүй бол хуурай өлсгөлөн зарлаж, цаашлаад өөрийгөө шатаах эсэхээ ч шийднэ хэмээн мэдэгдсэн. Харин энэ тухайгаа эхнэрээсээ асууна гэдгээ тодотгож байсан билээ.    

Цагдаагийн байгууллагаас гэмт хэргийн үйлдэл, сэдлийг олон нийтэд зарлахыг, ялангуяа дэлгэрэнгүй тоочин зарлахыг хориглодог. Хэвлэл мэдээллийнхэн ч ийм ёс зүйг эрхэмлэдэг. Харин төрийн түшээ, хууль боловсруулагч эрхэм улс даяар өөрийгөө шатаана хэмээн мэдэгдсэнээс хойш энэ нь бусад залууст сэдэл өгч, өнөөдрийн байдлаар хоёр ч залуу харамсалтайгаар амиа алдаад байна.

Хэдхэн хоногийн өмнө Төв талбайд нэгэн залуу өөр дээрээ шатахуун цацаж, олны нүдэн дээр амиа егүүтгэсэн билээ. Ажилгүй, орлогогүйдээ бухимдан ийм үйлдэл хийсэн тэрбээр хоёр хүүгийн аав байсан юм. 

Харамсалтай нь, энэ явдал дахин давтагдлаа. Тодруулбал, Ховд аймгийн Дуут сумын харьяат, 17 настай, эрэгтэй М нь урд шөнө өөр дээрээ шатахуун асган амиа егүүтгэсэн ноцтой хэрэг гарчээ. Тэрбээр айлын гэрээс хулгай хийж байгаад баригдангуутаа айн цочир ийн үйлдэл хийсэн байна. Тус аймгийн Онцгой байдлын болон цагдаагийн алба хаагчид хэргийн газарт ажиллаж байгаа аж.

Хулгай хийж байгаад баригдсан 17 настай хүү сандрахдаа толгойд нь орж ирсэн эхний бодол өөрийгөө шатаан амиа егүүтгэх. Өмнө энэ тухай сонссон, харсан болоод тухайн үед толгойд нь зурсхийсэн нь тэр. Энэ мэт ноцтой хэргийн сэдэл өгснөөрөө С.Ганбаатар гишүүн хариуцлага хүлээх үү. Түүний богино улс төр, попролтын золиос залуус болж байна. 

У.Тэргэл