Боловсрол, шинжлэх ухааны сайд Л.Энх-Амгалан уналтад ороод байгаа энэ салбарт шинэчлэлт, өөрчлөлт хийнэ гэсэн итгэл үнэмшил нийгэмд хэдийнэ төрүүлээд эхэлсэн.

Харин түүний сүүлийн үеийн мэдэгдэл, ялангуяа 10 ба түүнээс дээш сая төгрөгийн төлбөртэй сургуульд хувьсах зардлыг өгөхгүй байхаар шийдвэрлэсэн нь маргаан дагуулаад байгаа билээ.

Энэ мэт түүний шийдвэр эхнээсээ шүүмжлэл, сайшаал дагуулж эхлээд буй. Харин энэ удаад сайд таны анхаарал хандуулах  нэгэн чухал асуудал нь сүүлийн арваад жил төрийн албанд бугшсан албан тушаал, эрх мэдлээ ашиглан хүүхдээ гадаадын нэр хүндтэй, өндөр төлбөртэй их, дээд сургуульд төсвийн мөнгөөр сургадаг явдал юм.

Даргын хүүхэд дарга байх ёстой гэсэн хэвшмэл ойлголтыг халж, шударга өрсөлдөөнийг бий болгож байж, боловсролын салбар эрүүлжинэ.  Энэ тухай баримттайгаар олон жил ярьж, хэвлэл мэдээллийнхэн дэлгэж ирсэн ч нөгөө л төр, засгийн сэнтийд суугаа эрхмүүдийн хүүхдүүд энэ ямба, эрхийг эдэлдэг болохоор тэгсхийгээд л замхардаг. Харин энэ удаад ганц байгууллагыг иш татъя.

Авлига хаана хамгийн их байгаа талаарх судалгааны эхний гуравдугаарт Иргэний нисэхийн ерөнхий газар байнга явж ирсэн. Өдгөө ч энэ байраа хойшлуулах нь бүү хэл урагшлуулсан гэж хэлж болно. ИНЕГ-ын үе үеийн  дарга дарга нар  улсын төсвийн хэчнээн төгрөгийг эрх танхил хүүхдүүддээ зориулав.

-2015 онд тухайн үеийн ИНЕГ-ын удирдлага, дарга нарын 62 хүүхэд 3,3 тэрбум төгрөгөөр гадаадын их, дээд сургуульд сурсан.

-2016 онд ИНЕГ-ын дарга нарын 57 хүүхэд 1,8 тэрбум төгрөгөөр гадаадад сурсан,

-2017 онд ИНЕГ-ын 11 дарга, албан тушаалтны хүүхдүүд  370 сая төгрөгөөр,

-2018 онд тус газрын удирдах албан тушаалтнуудын 17 хүүхэд 750 сая төгрөгөөр гаднын их, дээд сургуульд сурсан,

-2019, 2020 онд нийт 1,92 тэрбум төгрөгөөр ИНЕГ-ын удирдлагууд хүүхдүүдээ гадаадын их, дээд сургуульд сургасан байна.

Боловсролын салбарт олон жил бугшсан ч өдгөөг хүртэл шийдэлд хүрдэггүй, олон мянган аавын хүү, ээжийн охины боломжийг хулгайлсан энэхүү луйврыг таслан зогсооход Боловсрол, шинжлэх ухааны сайд таны зоримог шийдвэр, шийдэл одоо л хэрэгтэй байна.

У.Тэргэл