Албан тушаалаа өгөх дараагийн эрхэм Улаанбаатар хотын Ерөнхий менежер бөгөөд Захирагчийн ажлын албаны дарга Т.Гантөмөр бололтой. Тэрбээр энэ албандаа он удаан жил болж байгаа ч хийсэн гай үгүй, гавьяа үгүй нэгэн гэдэг. Тиймдээ ч Ерөнхий сайд Л.Оюун-Эрдэнэ “Хэвлэлд ярилцлага өгөх дуртай. Хэвлэлээр ажлаа явуулдаг, байнгын хэл аманд өртөж явдаг Хотын ерөнхий менежер Т.Гантөмөр нарын хүмүүс зайгаа тавьж өгөх хэрэгтэй. Чаддаг залууст нь ажлаа өгөх хэрэгтэй ” хэмээн ширүүхэн шүүмжлээд амжсан юм.

Үнэндээ Т.Гантөмөр даргатай холбоотой гомдол, шүүмжлэл тасардаггүй. Хамгийн сүүлд гэхэд л, Хотын ерөнхий менежер гүйцэтгэгч компаниар ажил гүйцэтгүүлэхдээ сонгон шалгаруулалтыг хуулийн дагуу явуулаагүй, тусгай зөвшөөрөлгүй компанид улсын төсвийн мөнгийг шилжүүлж, ажил гүйцэтгүүлсэн нь албан тушаалаа ашигласан хэрэг. 

Тэрбээр ашиг хонжоо хайж, улсад 400 сая төгрөгийн хохирол учруулсан хэмээн иргэн Д.Энхбат Авлигатай тэмцэх газарт хандаж, баримтыг нь өгч байлаа.

Мөн иргэн Б.Батгэрэл АТГ-т хандаж, Хотын ерөнхий менежер Т.Гантөмөр нь “Улаанбаатар шинэчлэл” ХХК-иас 583. 237.500 төгрөг “Грейт роуд” ХХК-иас 689.685.000 төгрөг, “Эко орчин” ХХК-иас 273.700.000 төгрөгийн үйлчилгээг тендерийн сонгон шалгаруулалтгүйгээр шууд Улаанбаатар хотын Захирагчийн ажлын албаны хот тохижилтын төлөвлөлтийн зардлаас худалдан авахаар шийдвэрлэсэн нь хуулийн хоёр ч заалтыг ноцтой зөрчсөн хэмээн Авлигатай тэмцэх газарт шалгуулахаар хандаж байлаа.

Ерөнхий сайдын ил тод шүүмжлэл дараагийн албан тушаалаа өгөх хүн нь өөрөө шүү гэдэг дохиог өгчихлөө. Харин энэ нь зөвхөн цаг хугацааны л асуудал болж үлдэж байна.

У.Тэргэл