Монгол Улсын Засгийн газар коронавирусний цар тахлыг талаарх нэгдсэн мэдээлэл өгөх зорилготой "Эрсдэлийн Мэдээллийн Хороо" байгуулсан. Тус хорооны даргаар Соёлын сайд Ч.Номин, нарийн бичгийн даргаар нь Харилцаа холбоо, мэдээллийн технологийн газрын дарга Б.Болор-Эрдэнэ ажиллаж байгаа. 

Уг хороог байгуулснаас хойш ард түмэнтэй ичнээ танил болсон Эрүүл мэндийн яамны ахлах шинжээч Д.Нарангэрэл бус салбарын сайдаар саяхан томилогдсон С.Энхболд мэдээлэл түгээх ажилтай болж хувирав. "Эрсдэлийн Мэдээллийн Хороо"-ны нэгдсэн мэдээлэл гэдэг нь энэ бололтой.

Жил гаруйн хугацаанд Эрүүл мэндийн яамнаас өгч байсан мэдээлэл нь муу байгаагүй гэдэгтэй санал нийлэх хүн олон биз. Харин төр засгийн гаргаж байсан толгой эргүүлэм элдэв шийдвэр, тушаал нь л зөрж байснаас бус ЭМЯ-ны хэвлэлийн хурал "Гай" тариагүй байлтай. Коронавирусний талаарх мэдээллийг яамны ажилтан олон нийтэд түгээж болоод л байсан. 

Гэтэл өдгөө Соёлын сайдаар ахлуулсан "Эрсдэлийн Мэдээллийн Хороо" гээчийг байгуулж, бүхэл бүтэн салбарын сайдаар нь 11 цагийн хэвлэлийн бага хуралд Хэвлэлийн төлөөлөгч хийлгээд сууж байх. 

Угтаа Эрүүл мэндийн сайд нь салбарыг бодлого, зохицуулалтаар хангаж, "Том" ажиллах учиртай. Коронавирусний цар тахалтай дэлхий нийтээрээ тэмцэж буй өнөө үед Эрүүл мэндийн сайдад үүнээс өөр хийх олон ажил байлтай. 

Б.Баатар