Монгол Улсын Үндсэн хуулиар хүлээсэн журамт үүргээ биелүүлж, хугацаат цэргийн албаа нэр төртэй хааж байгаа нэгэн байлдагчид маань баяр бахархлын захидал ирлээ. Ховдын хороо гэдгээрээ алдаршсан Зэвсэгт хүчний 123 дугаар ангийн хугацаат цэргийн алба хаагч, байлдагч Х.Сүхбат захидлыг ч тун баяртайгаар уншиж байна. Хамтдаа задалъя.
“Сайн уу, хайраа. Чамдаа сар шинийн мэнд хүргэхийн ялдамд саяхан болж өнгөрсөн гэгээн хайрын өдрийн мэнд хүргэе. Энэ өдөр чи бид хоёрт хэзээ ч мартагдахааргүй аз жаргал бэлэглэж, чи бид хоёр аав, ээж боллоо. Яг чам шиг минь эх орноо батлан хамгаалах хүү төрлөө. Чи бид хоёрын алаг үр яасан ч хөөрхөн юм бэ. Хэвлийгээс минь унаж, хорвоо дэлхийд ирснээ зарлан часхийн уйлахад нь л эх хүний л мэдэрч чадах, үгээр хэлэмгүй тэр их хайрыг мэдэрч байна. Ханийгаа ч гэсэн надаас илүү догдолж, хөл нь газар хүрэхгүй баярлаж байгааг нь би мэдэрч байна. Нүд нь яг л аав шигээ, хамар нь ч аав шигээ, ер нь тэр чигээрээ чи минь. Хүүдээ би “Аав нь цэрэг хүн. Эх орноо батлан хамгаалагч эр цэрэг. Миний хүү ч гэсэн 18 жилийн дараа аав шигээ цэрэгт яваарай” гэж ерөөсөн шүү.
Төрөх эмнэлэгт очиход “Аав нь хаана байгаа юм бэ” гэж эмчид асуухаар нь эр цэргийн албандаа яг та биднийг хамгаалаад зогсож байгаа гэсэн чинь “Ханиа зөв сонгожээ. Цэрэгт явж байна гэдэг эх орноо хайрлах ухамсартай залуу гэдгийг нь илтгэж байна” гээд баяр хүргэсэн шүү. Олон аавын хөвгүүдтэй мөр зэрэгцэн алба хааж байгаа чамаараа үнэхээр их бахархаж байна. Энэ жил орчин цагийн Зэвсэгт хүчний 100 жилийн ой тохиож байгаа талаар зурагтаар ярьж байна лээ. Миний хань түүхэн жилд алба хааж, удмаа үргэлжлүүлэх алаг үртэй болсон сайхан жил байна шүү. Нээрээ, үрийнхээ тухай ярьсаар байгаад чамайгаа асуухаа мартах шахаж. Чи минь сайн байгаа биз дээ. Надад дээр явуулсан зургийг харахад үнэхээр сайхан жавхаатай, цог золбоотой цэрэг болсон байна лээ. Ханиа хүүдээ нэр хайрлаарай. Хоёулаа цэрэг дайчид, төр улстай холбож өгвөл их гоё байж магадгүй, тийм ээ. Зэвсэгт хүчний 123 дугаар ангийн удирдлага, хамт олон, онжавуудад нь мэнд хүргэж байгааг минь уламжлаарай. Түр баяртай, эрхэм байлдагч, эрхэм аав минь. Хань Д.Үүрийнгэгээ, хүү хоёроос нь, Улаанбаатар хот” гэжээ.
