Манай улс коронавирусний эсрэг вакциныг удахгүй оруулж ирэхээр болж, иргэд  ч хэд хэдэн төрлийн вакцинаас сонголтоо хийхээр болсон. Гэвч хийлгэнэ, хийлгэхгүй гэх зөрчилдөөн нийгэмд үүсч, зарим нь иргэдийг буруу үйлдэлд турхирч буй. Харин  Эрүүл хамгаалахын гавьяат ажилтан, академич П.Нямдаваа вакцины талаар ийн өгүүлж байна. П.Нямдаваа академчийн хувьд вирус, нян судлалаараа Монголдоо тэргүүлэгч эрдэмтэн бөгөөд ЗХУ-ын эрдэмтдийн багтай хамтран сахруу, татран, цагаан цэцэг зэрэг халдварт өвчний вакциныг боловсруулан гарган авч, нам дарж байсан түүхтэй.

Академич П.Нямдаваа энэ талаар “Манай улс хөгжилтэй орнуудаас азаар вакциныг эрт таньсан. Өөрөөр хэлбэл, 1920-иод оны дундуур хуучнаар  ЗХУ-ын эмч нарын тусламжтайгаар бактери шинжилгээний газрыг байгуулсан. Тэгээд өөрсдөө вакцин хийгээд 1933 онд ЗХУ-ын эрдэмтдийн тусламжтайгаар цагаан цэцэг өвчинг нам дарж, нэг сая гаруй хүний амийг аварч чадсан. Тиймээс халдварт энэ өвчин 1939 оноос хойш нэг ч гараагүй. Вакциныг зөв хэрэглэж чадвал халдварт өвчний тархалтыг таслан зогсоох, урьдчилан сэргийлэх маш чухал зэвсэг юм.

Харамсалтай нь, манай улс вакцин боловсруулах технологио үргэлжлүүлэн ашиглаагүйгээс  хүнд хэрэгцээт вакциныг дахин хийж чадаагүй, өөрөөр хэлбэл, бид маш том ухралт хийсэн. 80 жилийн өмнө өөрсдөө вакцинаа хийж байсан бол одоо юу ч үгүй болсон. Төр, засгаас 2000 онд дархлаажуулалтын хуулийг баталсан. Тиймээс сумд бүү хэл улсынхаа хэмжээнд дэд бүтэцтэй.

Улаанбаатар хотод гэхэд л ХӨСҮТ-д вакцины депо гэгддэг том хэмжээний агуулахтай, хариуцсан тусгай нэгжтэй. Манайх вакцины дэд бүтэцтэй, сайн боловсон хүчинтэй улс орон учраас харьцангуй богино хугацаанд халдварт өвчинг барьж чадна. Вакцинжуулалт эрүүл мэнд болон эдийн засгийн хувьд чухал ач холбогдолтой” гэв.

У.Тэргэл