БШУЯ-наас танхимын хичээлийг гуравдугаар сарын нэгнээс эхлүүлэх хүсэлтийг УОК, Засгийн газарт хүргүүлсэн. Уг асуудалтай холбоотойгоор Засгийн газар хуралдаж буй.

Тэгвэл Шадар сайд танхимаар хичээллүүлэх нь хүүхдэд маш их эрсдэлтэй гэсэн байр сууриа илэрхийлжээ.

Энэ талаар УОК-ын хэвлэлийн төлөөлөгч, Засгийн газрын ХМОНХХ-ийн дарга Ц.Ганзориг “Өчигдөр болсон УОК-ын өргөтгөсөн тавдугаар хуралдаанаар Шадар сайд танхимаар хичээллүүлэх нь хүүхдэд маш их эрсдэлтэй гэсэн байр сууриа илэрхийлсэн. Тодруулбал, коронавирусний эсрэг дархлаажуулалтын ажил энэ сарын сүүлээр эхэлнэ. Ингээд гурав болон дөрөвдүгээр сард дархлаажуулалт үргэлжилнэ. Энэ нь нэг талаар эрсдэлтэй цаг хугацаа болох тул танхимаар хичээллүүлэх нь хүүхдэд эрсдэл үүсгэнэ.

Мөн сургуулиудын хичээлийн танхимыг вакцинжуулах танхим болгон ашиглана гэж шийдвэр гараагүй. БШУЯ бол энэ тал дээр дэмжихгүй байгаа. Вакцинжуулалтын танхим, хуваарийн асуудал удахгүй зарлагдана.

Ямартай ч гуравдугаар сарын нэгнээс танхимаар хичээллүүлэх ёстой гэх байр суурийг Шадар сайд илэрхийлээгүй. БШУЯ-ны зүгээс л байр суурь болон саналаа илэрхийлсэн. Өнөөдөр уг асуудлыг Засгийн газрын хуралдаанд хэлэлцэж байна" гэлээ.

Б.Баатар