Сурагчдын хичээлийг ирэх сараас эхлэн танхимаар явуулахаар судалж байгаа талаар БШУ-ны сайд Л.Энх-Амгалан өмнө нь удаа дараа мэдэгдсэн. Учир нь сурагчдын 70-80 хувь нь хичээлийн хоцрогдолд орсон. Тиймээс хичээлийг эцэг, эхчүүдийн саналаар танхимаар болон теле гэсэн хоёр хэлбэрээр явуулах зайлшгүй шаардлага үүссэнийг онцолсон билээ.

Сайдын дээрх мэдэгдэлтэй холбогдуулан эцэг, эхчүүд танхимаар сургах нь зөв эсвэл хэт эрсдэлтэй гэсэн байр суурийг өөрсдийн цахим хуудсаараа дамжуулан илэрхийлжээ.

Гэхдээ багш нь цахим хэлбэрээр зарим зүйлийг тодруулж заахад гэртээ гэрэл цахилгаангүй, комьютергүй, гар утас, интернетгүй өрх олон байна.

Эдгээрийг ч бодож үзэх ёстой. Улмаар хүүхдүүд теле хичээл, цахим сургалтандаа сууж чадахгүй байх зэрэг олон шалтгаан үүсэж байна.

Хичээлийг ирэх сараас танхимаар явуулах эсэх асуудал өчигдөр Засгийн газрын ээлжит хуралдаанаар яригдсан ч одоогоор тодорхой мэдээлэл гараагүй байгаа юм. Харин Засгийн газрын хэвлэлийн албаны дарга Ц.Ганзоригийн өгсөн мэдээллээс үзвэл Шадар сайд хичээлийг танхимын хэлбэрээр явуулбал эрсдэлтэй гэж дүгнэжээ.

Үндсэн хуульдаа хүн бүр сурч боловсрох эрхтэй гэж заасан ч эрхээ эдэлж чадахгүй байгаа олон айл өрхийн хүүхдүүдийг ч бодох ёстой. Тиймээс ядаж халдвар огт гараагүй аймгуудын сурагчдыг танхимаар хичээлээ үзэх тэр боломжийг нь нээж өгвөл яасан юм, Шадар сайд аа.

А.Сүх