Хувийн сургуулийн сурагчдын эцэг, эх сургалтын төлбөрөө төлөөгүйн улмаас хүүхдүүд хичээлээ үзэж чадахгүйд хүрч, энэ нь эцэг, эхчүүдийг бухимдуулж эхлээд байна. Танхимаар хичээллээгүй ч зайны сургалт цахимаар яваа тул төлбөрөө бүрэн төлөх ёстой гэсэн шаардлагыг хувийн сургуулиудын удирдлагууд эцэг, эхчүүдэд тавиад байгаа аж.

Тухайлбал, “Олонлог” сургууль сүүлийн гурван сар төлбөрөө төлөөгүй сурагчийн цахим сургалтын эрхийг цуцалж байгаа аж. Нэгэн аав “Бид охиныхоо сургалтын төлбөрийг бага багаар төлж байсан ч энэ долоо хоногт цахим хичээлдээ орох гэсэн боловч эрхийг нь хязгаарласан байсан. Тиймээс охин маань хичээлээ үзэх боломжгүй болоод байна. Хатуу хөл хорионы энэ үед эцэг, эхчүүдийн орлого буурч, заримынх нь бизнес нь бүрмөсөн зогссон. Засгийн газраас сургуулийн дулаан, цахилгаан, усны мөнгийг төлж байгаа. Тиймээс сургуулийн удирдлагууд сурагчдаа бодон төлбөрт нь уян хатан хандаж   болдоггүй юм болов уу” хэмээж байлаа.

Боловсрол, шинжлэх ухааны яаманд хувийн сургуулиудын сургалтын төлбөртэй холбоотой энэ төрлийн гомдол олноор иржээ. Тиймээс яамнаас  нэгдүгээр сарын 18-наас тодорхой журам гарган, хувийн сургуулиудын удирдлагуудад зөвлөмж хүргүүлсэн байна. Боловсрол, соёл, шинжлэх ухааны яамны газрын дарга Т.Ням-Очир энэ талаар “Яамнаас хувийн сургуулиудын удирдлагуудад зөвлөмж хүргүүлсэн ч сургалтын төлбөрт уян хатан хандаач гэдэг хүсэлт, гомдол ирсээр байна. Тиймээс бид зөвлөмжийг улам нарийвчилж гаргах хэрэгтэй юм байна гэж үзээд холбогдох газруудтай хэлэлцээрт орохоор ярьж байна. Хэлэлцээрээс уриалга гаргана” гэлээ. Тухайлбал, төлбөрийг дараагийн сард шилжүүлэх зэргээр боломжит хувилбар сонгохыг уриалах ажээ.

Цар тахлын энэ үед сурагчид хичээлээсээ хэдийнэ хоцрогдож эхэлсэн.  Үүн дээр нэрмээс болж, төлбөрөө төлөөгүй хэмээн хүүхдийн эрхийг боомилж байгаад эцэг, эхчүүд бухимдах нь зүйн хэрэг . Энэ бүхний эцэст нэгэн таатай мэдээ нь, “Олонлог” сургуулийн удирдлага БШУЯ-наас өгсөн зөвлөмжийн дагуу охины эцэг, эхтэй харилцан тохиролцож, гэрээндээ өөрчлөлт оруулсан байна. Дашрамд, “Олонлог” сургуулийн нэг сурагчийн жилийн төлбөр 8.750.000, нэг гэрийн хоёр хүүхэд 6.300.000 төгрөгийн төлбөртэй юм байна.  

У.Тэргэл