Баянзүрх дүүргийн эмнэлэг коронавирусний халдварт өвчний хамгийн том эрсдэлт голомт болсон. Тус эмнэлэгт хэвтэн эмчлүүлж байсан 82 өвчтөн, 19 эмч, сувилагч , 24 сахиур, 28 гэр бүлийн хамаарлын гээд 184 хүн тус эмнэлгийн голомтоос халдвар авсан билээ. Ариутгал, халдваргүйжүүлэлт хийгээгүй, байрны ариун цэвэр муу, цар тахлын үе мөрдөх дэглэм, журмыг  огт баримтлаагүйгээс халдвар гарсныг холобгдох байгууллагууд тогтоосон.

Тодруулбал, УОК, ЭМЯ-наас томилсон ажлын хэсэг тус эмнэлэгт ажилласан бөгөөд эмч, ажилтнууд эмнэлгийн удирдлагуудын хариуцлагагүйн улмаас халдвар тархсаныг хүлээн зөвшөөрч, хяналт, шалгалтын дүнг удахгүй танилцуулна хэмээж байсан ч УОК-ын дарга асан Я.Содбаатар албан тушаалаа өгснөөр сураг алдарсан юм.

Я.Содбаатар дарга тухайн үед “Баянзүрх эмнэлэг хувийнх болохоор бид ажилд нь хөндлөнгөөс шууд орж болохгүй байна хэмээж байсан. Харин эцэстээ халдварын хамгийн том голомт болсон хойно ниргэсэн хойно нь хашгирав гэгчээр гэнэт хяналт шалгалт оруулж, сүрийг үзүүлсэн билээ. Энэ дагуу тус эмнэлгийн дарга Б.Даш-Яндаг, гүйцэтгэх захирал Ө.Туул болон бусад удирдлагуудыг нь цагдаагийн байгууллагаас шалгаж байгаа билээ. 

Баянзүрх 360 мянган хүн амтай нийслэлийн хамгийн том дүүрэг. Дээр нь баянзүрхчүүдийн үйлчлүүлдэг ганц эмнэлэг. Тиймээс халдварын голомт болсон тус эмнэлгийн үйл ажиллагааг хэсэг хугацаанд зогсоож, ариутгал халдваргүйжүүлэлтийг дээд зэргээр хийснээр эргэн нээсэн билээ.

Гэвч тус эмнэлгийн үйл ажиллагаатай холбоотой гомдол тасрахгүй байгаагийн дээр эмнэлгийн удирдлагууд эмч, ажилтнууддаа элдэв юм гадагш ярихгүй байхыг хатуу анхааруулсан гэх.   Хамгийн гол нь, тус эмнэлэг өнөөдрийг хүртэл халдварын эрсдэлтэй голомт хэвээр байгаад учир нь байгаа юм. Тодруулбал, тус эмнэлэгт хэвтэн эмчлүүлж байсан, хүүхдээ сахиж байсан эх гээд хэд хэдэн хүн халдвар авч, тэднийг Цэргийн төв госпиталд тусгаарлажээ. Мөн ойрын хавьтлын хүмүүсийг ч тусгаарласан байна.

Халдваргүйжүүлэлтийг дээд зэргээр сахих дэглэм энэ эмнэлэгт дахин алдагдсанаас эсвэл халдварын голомтыг бүрмөсөн устгаж чадаагүйгээс ийн халдвар  дахин дэгдэж, иргэдийг эрсдэлд оруулж байна. Б.Даш-Яндаг дарга аа, энэ хариуцлагагүй байдал хэдийг хүртэл үргэлжлэх вэ.

Эрүүл хүн эмнэлгээр үйлчлүүлээд халдвар авсаар байх уу. Хувийн, хувьсгалынх бай хамгийн гол нь хүний эрүүл мэнд хамгаас эрхэм. УОК,  ЭМЯ үүнд онцгой анхаарал хандуулж, таслан зогсоохгүй бол эрсдэлтэй энэ голомт чинь эргэн сэргэхэд ойрхон байна.

У.Тэргэл