Турк улсад тоглолт хийхээр очоод бүтэн жил гацсан “Шонхоодой” циркийн жүжигчин хүүхдүүд эх орондоо иржээ. Тус циркийн бүрэлдэхүүнд амьдралын хүнд нөхцөлд байсан, өнчин хүүхдүүд харьялагддаг байна. “Шонхоодой” циркийн талаар болон Турк улсад бүтэн жил гацсан талаар циркийн багш Т.Төмөртэй ярилцлаа.

-Сайн байна уу. Та бүхэн хэзээ Турк улсыг зорьсон болоод бүтэн жилийн хугацаанд эх орондоо ирж чадаагүй талаараа хуваалцахгүй юу?

-Бид өнгөрсөн оны намар тоглолтоор Турк улсыг зорьсон. Тухайн улсад очоод тоглолтоо хийж, зарим уран бүтээлчид маань арваннэгдүгээр сард Монгол руугаа буцаж, харин би зарим шавь нартайгаа тус улсад үлдсэн юм.  Гэсэн ч дэлхий дахинаа халдварт өвчин гарч, товлосон тоглолтууддаа үргэлжлүүлэх боломжгүй болсон. Тэгээд Турк улсын Анталиа хотод гацаж, улмаар эх орондоо ирэхээр бүтэн жил хөөцөлдсөн ч ирж чадахгүй байсан юм. Бидэнд санхүүгийн болоод олон талын бэрхшээл тулгарсан. Харин хоёр хоногийн өмнөх тусгай үүргийн нислэгээр эх орондоо ирж, өнөөдөр тусгаарлалтад байна.

-Хамтлагийн гишүүд болоод таны бие сайн биз дээ.

-Бид бүхэн сайн байгаа. Эх орондоо ирээд үнэхээр баяртай байна.

-Турк улсад гацсан хугацаанд та бүхэн хаана байрлаж байв?

-Шонхоодой хамтлагийг урьж тус улсад тоглолт зохион байгуулдаг компанийнхан биднийг өөрсдийн байранд байрлуулж, хоол ундаар хангаж байсан. Сүүлдээ нөгөө байгууллага маань ч хоолны мөнгөөр хангахад хүнд болж, бид хэцүү байдалд орж эхэлсэн нь нууц биш. Тэд уран бүтээлчдийг ойлгож байсанд мөн маш их баярласан.

-УИХ-ын гишүүн С.Одонтуяа та бүхнийг эх орондоо ирэхэд туслалцаа үзүүлсэн гэж байсан?

-Тийм ээ. Бид С.Одонтуяа гишүүнд үнэхээр их баярлаж байгаа. Бүтэн жилийн хугацаанд Турк улсад гацсан байхдаа эх орондоо ирэх талаар чамгүй хөөцөлдсөн ч үр дүн өгөөгүй. Харин гэр бүлийн хүн маань “С.Одонтуяа гишүүнийг гадаадад байгаа иргэдээ татан авахад анхаарна. Төрийн ордонд суулт зарлалаа” гэх мэдээллийг олж үзсэн байсан. Тэгээд тухайн гишүүнд хандахад маш эерэгээр хүлээн авч, бидэнд шуурхай арга хэмжээ авч, тусалсан. Энэ завшааныг ашиглаад дахин баярласан сэтгэлээ илэрхийлмээр байна. Гишүүн Турк улсын Элчин сайдтай холбогдож, биднийг татан авах ажлыг зохион байгуулснаас гадна онгоцны тийз, тусгаарлах байрны зардал зэрэгт ч тусалсан. Үнэхээр эх орон гэж байдаг юм байна.    

-Хамтлагийнхаа талаар танилцуулахгүй юу?

-Шонхоодой хамтлаг маань нийт 40 уран бүтээлч хүүхэдтэй. Хүүхдүүд маань багаасаа энэ хамтлагтаа тоглож, өнөөдөр мэргэжлийн хэмжээний уран бүтээлчид болсонд багшийн  хувьд баяртай байдаг. Шонхоодой хамтлаг маань Дархан-Уул аймгийн Залуучууд театрын дэргэдэх Шонхоодой ардын циркийн хамтлаг гэж явдаг.

-Уучлаарай багш аа. Хамтлагийн дийлэнх нь амьдралын хүнд нөхцөлд байсан, өчин хүүхдүүд байдаг гэх мэдээлэл байна?

-Тийм ээ. Энэ үнэн. Эхнэр бид хоёр циркийн сургуулиа төгссөнөөсөө хойш 16 жил гаднын улс оронд мэргэжлээрээ уран бүтээлээ туурвиж байгаад эх орондоо ирсэн. Тухай үед  хамтлагийнхаа гишүүд болох хүүхдүүдтэйгээ танилцаж, тэднийхээ амьдрал ахуйг ойлгож, дэм тус болох үүднээс өөрсдийн мэдэж сурсан зүйлийг зааж сурган, улмаар хамтлаг байгуулсан. Бяцхан шавь нар маань ч үнэхээр хичээнгүй суралцаж, өнөөдөр ар гэр, амьдрал ахуйгаа авч явж байгаад баяртай байдаг. Эхнэр бид хоёрын хувьд тэднийхээ дутуу сэтгэлийг нөхөж, зарим үед аав, ээж, зарим үед багш нь болоод л өнөөдрийг хүрсэн байна. Хамгийн гол нь хамтлагийн гишүүд болох шавь нарын маань хичээл зүтгэл энд маш их нөлөө үзүүлсэн. Би тэднээрээ үргэлж бахархаж байдаг. Мөн энэ хүртэл тусалж, дэмжиж байсан циркийн урлагийн хамт олон, Дархан-Уул аймгийн нутгийн удирдлагууд, театрын хамт олондоо маш их баярлаж, талархаж явдаг.

-Тэгэлгүй яах вэ багш аа. Шавь нар нь амжилттай явахад түүний ард багш хүний жаргал оршиж байдаг нь дамжиггүй. Та бүхний гаргасан амжилтын талаар дурдвал?  

-Миний хувьд 2011 онд Соёлын тэрүүний ажилтан цол тэмдгээр шагнуулж, мөн 2011 онд намайг “Энэ цагийн Эгэл баатар”-аар тодруулж байсан. Харин хамтлагийн тухайд “Болор эгшиглэн” улсын уралдааны тэргүүн байрын шагналт, Залуу циркчдын тэмцээний мөнгөн цомын эзэн, Алтан цом Улсын уралдааны цомын эзэд.

-Ардын урлагийг хөгжүүлж, таниулахад мэдээж цаг хугацаа, санхүүгийн хувьд олон бэрхшээл тулгардаг байх. Энэ талаар ярьж өгөхгүй юу?

-Тэгэлгүй яах вэ. Хамтлагийн уран бүтээлчдийн авъяас чадвараас гадна хувцас хэрэгсэл, гоо сайхны бүтээгдэхүүн, сургуулилт, бэлтгэлийн хэрэгсэл гээд маш олон зүйл шаардлагатай байдаг. Бидэнд санхүүгийн дэмжлэг үзүүлдэг ямар нэгэн байгууллага, аж ахуйн нэгж гэж байхгүй. Зөвхөн бор зүрхээрээ л явж ирсэн дээ. Уран бүтээлч хүүхдүүдтэйгээ аймаг, сумдаар тоглолт зохион байгуулах, цаашлаад гадны улс оронд тоглож, ардын урлагаа таниулахын зэрэгцээ санхүүгийн асуудлаа шийдэж ирсэн. Энэ ч утгаараа Турк улсыг зориод байсан нь энэ. Гэхдээ бид зөвхөн өөрсдийнхөө төлөө бус амьдралын хүнд хэцүүг туулж яваа өрх толгойлсон аав, ээж, өнчин хүүхдүүд , өндөр настан гээд нийгмийн эмзэг бүлгийнхэнд туслах зорилгоор мөн тоглолт зохион байгуулж, олсон орлогоосоо хэдэнд хандивлах сайн үйлсийн аянг маш ихээр явуулдаг. Энэ бол бидний гол зорилгын нэг.

Ярилцсанд баярлалаа. Та бүхний уран бүтээлд өндөр амжилт хүсье.

Б.Баатар