Засгийн газраас цаг үеийн асуудлаар мэдээлэл хийж байна.

Эрүүл мэндийн сайд С.Энхболд "Дөрөвдүгээр сарын 9, 12-нд нийт 600 мянган тун вакцин ирэх байсан нь хойшилсон. Үйлдвэрлэгч орон биш тул биднээс хамаарахгүй шалтгааны улмаас вакцины нийлүүлэлт хойшиллоо. Вакцины 2 дахь тунг эхнийхээс 21-56 хоногийн дараа хийлгэсэн тохиолдолд хамгаалах чадвар буурахгүй. Гуравдугаар сарын 25-наас хойш нас баралтын тоо огцом өсөж, энэ хугацаанаас хойш 15 хүн нас барсан. Энэ мэтээр нөхцөл байдал хүндэрсэн тул хөл хорио тогтоох санал гаргасан. 

Өнөөдрийн байдлаар 1864 хүн эмчлүүлж буйгаас хүнд 50, эрчимт эмчилгээний тасагт 10 иргэн эмчлэгдэж байна. Хоёрдугаар сарын 26-ны өдрөөс вакцинжуулалтыг эхлүүлж, тавдугаар сарын 1 гэхэд нийслэлийн хүн амаа нэг дэх тунгаар, тавдугаар сарын 31 гэхэд 2 дахь тунг нийслэлийн бүх хүнг хамруулна. Дархлаажуулалтын цэгийг 120-160-аар нэмэгдүүлэхээр төлөвлөж байна. Хөл хорио тавигдсаны дараа дархлаажуулалтыг үргэлжлүүлнэ.

Шаардлагатай  4,2 сая тунгаас 3,3 сая тунг авахаар гэрээ хэлэлцээрийг хийж байна. 1,7 сая тун вакцины төлбөрийг шилжүүлсэн. Цаашид 1,6 сая тунг авахаар хэлэлцээ хийж байгаа. Эхний ээлжийн вакцин 7-13 хоногийн дотор орж ирнэ. Зургаадугаар сарын эхэн гэхэд хоёр дахь тунг хийж дуусгахаар төлөвлөсөн. Өчигдөр оройн 00 цагийн байдлаар вакцины 192.137 тун вакцины үлдэгдэлтэй байна. Хамгийн ихдээ нэг онгоцоор 300 мянган тунг тээвэрлэн ирэх боломжтой. Нөөц дууссан, нийлүүлэлт дууссан асуудал байхгүй. Гагцхүү менежментийн асуудал байна" гэв.

Б.Баатар