Үндсэн хуулийн нэмэлт, өөрчлөлтөөр зургаан жилээр нэг удаа сонгогдох Монгол Улсын зургаа дахь Ерөнхийлөгч сар гаруйн хугацааны дараа тодрох нь ээ. Энэ дагуу парламентад суудалтай дөрвөн нам нэр дэвшигчээ ирэх сарын эхээр олон нийтэд албан ёсоор зарлана. Эрх баригч намаас хэн нэр дэвших нь тодорхой болсон. Харин МАХН эрх баригч намтай эвсэж сонгуульд өрсөлдөж магадгүй тухай мэдээлэл гараад буй.

Үлдсэн хоёр намын хувьд ямар хүн нэр дэвших нь одоогоор тодорхойгүй байна. Өрсөлдөөн монголын улс төрийн гол хоёр хүчин олох МАН, АН-ын дунд явах нь тодорхой. АН-аас одоогийн Ерөнхийлөгч Х.Баттулгыг нэр дэвшүүлэхээ удаа дараа мэдэгдсэн ч Үндсэн хуулийн цэцийн дүгнэлтээр боломжгүй болсон билээ.

Энд үүсээд буй гол асуудал нь намууд иргэдийг талцан хувааж, тэдний эрх мэдлийн төлөөх улайрал туйлдаа хүрч байна. Ялангуяа, дээр дурдсанаар улс төрийн голлох хоёр нам танай нам, манай нам Монголыг дарангуйлал руу чирж байна гэх. Дарангуйллын систем тогтож байгаа талаар хоёр намын гишүүд өнгөрсөн хугацаанд ам уралцан уралдаж, “чи”, “би”-дээ хүрлээ. Бид их үнээр ардчиллыг олж авсан. Үүнийгээ Үндсэн хуульдаа ч тунхагласан. Ухрах ёсгүй. Гэтэл Монголчуудыг хагалган бутаргаж, нэг намын тогтолцоо руу хөтлөх нь ямар хүний сонирхол вэ.

Өнөөдөр ч “дарангуйлал” гээчийг танай нам, манай нам бий болгож байна хэмээн хээв нэг бие бие рүүгээ чихэж сууна. Тунхаглаад ч байгаа юм шиг. Дарангуйлал гэдэг үгийг зүгээр нэг амны уншлага мэт гаргамааргүй байна. Чуулганы индрээс хэлж байгаа үг бүр хариуцлагатай байх ёстой гэдгийг гишүүдэд сануулъя. Тодруулбал, өнөөдөр чуулганы хуралдаанаар УИХ-ын гишүүн Ц.Туваан “Монгол Улсад нэг намын дарангуйлал тогтлоо”, УИХ-ын гишүүн Ц.Сандаг-Очир “Монгол Улс парламентын засаглалаас нэг хүний засаглал руу яваад байгаа юм биш үү. АН ийм зам руу оруулах гээд байна” гэв. Бидний эрх ашиг, хүсэл зоригийг илэрхийлж, биднийг төлөөлөөч гэж сонгосноос эрх мэдлийн төлөө улсын эрх ашгийг уландаа гишгэлж, иргэдийг талцан бутарга гэж их эрх эдлүүлээгүй шүү гишүүд ээ.

А.Сүх